TERUGBLIK 2: NOG 80 SKETSE VAN ONS GESKIEDENIS
Deur FRANSJOHAN PRETORIUS Protea Boekhuis, R302*
Die tweede versameling van prof. Fransjohan Pretorius se rubrieke oor die geskiedenis van Suid-Afrika wat in Beeld verskyn het, is heerlike leesstof. Jy ontmoet hier “helde en hendsoppers, skurke en sterre” en word herinner aan die grootste momente sowel as ’n paar minder bekende maar ewe interessante gebeure.
Die rubriek oor plaasname wys hoe ’n nuuskierige historikus verlei kan word om in ’n argief te gaan grawe agter iets skynbaar onbenulligs aan, wat dan vermaaklike leesstof oplewer. So is Rietfontein in die 19de eeu 132 keer as plaasnaam geregistreer, Nooitgedacht 108 keer en Waterval 76 keer. By Wakkerstroom was daar ’n plaas Droefheid op Noten, by Vryheid Bedrog en Onrecht en by Middelburg Bliksem. Daar was ook Drievrouw, Goedvrouw, My Darling en Dikvrouw.
Prof. Pretorius het ook hier verwys na die plaasnaam Kiss Me Quick and Go My Honey.
Ná die verskyning van die rubriek het ’n leser hom gekontak en gesê daar was werklik ’n geval van die boer wat onverwags tuisgekom het en ’n landmeter wat toe vinnig moes spore maak. Nou ja, nie alle geskiedenisfeite kan altyd gestaaf word nie.