DIE VROU AAN SY SY
Op ’n ouderdom dat die meeste mense by die see gaan aftree, begin Charles die werk waarna hy sy lewe lank uitgesien het. Die steun van sy vrou sal dus vir hom besonder belangrik wees.
Haar warm persoonlikheid en die manier waarop sy nooit die kollig by haar man probeer steel nie, vind byval by die publiek, en kenners voorspel sy sal aanhou om op die agtergrond te werk aan kwessies wat haar na aan die hart lê.
“Sy doen haar werk baie goed,” sê iemand wat haar ken aan People. Sy doen veral haar deel vir organisasies wat hulle vir vroueregte beywer en gesinsgeweld beveg.
Sy geniet dit blykbaar om namens haar man amptelike geleenthede waar te neem. Dis vir haar lekker om skole te besoek, op amptelike kuiertjies aan versnaperings te smul, en selfs op oorsese toere danspassies te leer.
“Camilla maak Charles vrolik,” sê ’n vriend. “Om hulle saam te sien gee ’n mens ’n idee van hoe die toekomstige monargie kan lyk.”