Gefragmenteerde aandag
Volgens ’n studie ontvang jong mense gemiddeld 192 kennisgewings per dag op hul foon.
As ’n mens daarby voeg die tientalle ander apps waarvoor hulle die kennisgewings afgesit het, is die getal daaglikse onderbrekings veel hoër. En dís net die gemiddelde tiener.
As ’n mens fokus op dié wat hul foon veel meer gebruik, soos ouer tienermeisies, word hulle gemiddeld een keer per minuut deur hul foon onderbreek.
Hierdie oneindige stroom onderbrekings – hierdie deurlopende fragmentering van aandag – benadeel tieners se vermoë om te dink en los permanente letsels op hul brein, wat tydens hul tienerjare vinnig vorm aanneem.
Talle studies het al gewys tieners met fone gebruik dit in die klas en gee minder aandag aan hul onderwysers.
Mense kan nie regtig meer as een ding op ’n slag doen nie. Jy kan hoogstens vinnig tussen meer as een taak heen en weer spring. So gaan baie aandag verlore elke keer as jy van taak verwissel.
Een van die vernaamste vaardighede wat tieners moet ontwikkel, is “uitvoerende funksie”, die vermoë om planne te maak en dan die nodige dinge te doen om daai planne te verwesenlik.
Uitvoerende funksie ontwikkel stadig want dit is in die prefrontale korteks geleë, die laaste breindeel wat gedurende puberteit herbedraad word. Belangrike vaardighede vir uitvoerende funksie sluit in selfbeheer, fokus en die vermoë om aandagafleiers te weerstaan. Kinders wat hul jeug op die foon deurbring, het swakker uitvoerende funksie.
Ek kan nie regtig aanvoer ligte gebruik van hierdie produkte is skadelik vir jou aandag nie, maar onder swaar gebruikers vind ons gedurig swakker uitkomste, deels omdat hulle tot ’n mate verslaaf is.