GEMARINEERDE OONDHOENDER
GENOEG VIR 4-6 MENSE / BEREIDING: 15 MIN. MARINEER: 2-3 UUR OF OORNAG / GAARMAAK: 1 UUR
Amasi en karringmelk is heerlik in marinades vir hoender. Dit verseker die vleis bly lekker sappig en braai mooi goudbruin. Jy kan dit ook vir hoenderporsies of kebabs gebruik.
1 heel hoender
MARINADE
500 ml (1 k) amasi of karringmelk
45 ml (3 e) olyfolie 4 knoffelhuisies, fyngerasper
15 ml (1 e) hoender-speserymengsel 5 ml (1 t) sout
5 ml (1 t) vars gemaalde peper
2,5 ml (½ t) dijonmosterd
5 ml (1 t) heelkorrel-mosterd fyngerasperde skil van 1 suurlemoen 2 lourierblare
’n hand vol vars pietersielie, fyngekap
AFRONDING
15 ml (1 e) olyfolie sout en vars gemaalde peper gekapte vars pietersielie suurlemoenskyfies
Sit ’n noupassende draadrakkie in ’n oondbak, en bespuit goed met kossproei.
1 Sny die borsbeen van die hoender uit, draai die hoender om en druk plat met jou hand. Sit die hoender in ’n verseëlbare niemetaal-marineerbak.
2 Marinade Meng als goed saam en skep oor die hoender. Vryf die hoender met die marinade in, en maak seker dit is oraloor bedek. Verseël die bak goed en marineer 2-3 ure of oornag in die yskas.
3 Afronding Voorverhit die oond tot 180 °C. Haal die hoender uit die marinade en sit met die velkant na bo op die draadrakkie. Giet enige orige marinade oor die hoender. Giet ook ’n klein bietjie water onderin die oondbak.
4 Geur die hoender met sout en peper en drup die olie oor. Rooster 40 min.
5 Verhoog die hitte tot 200 °C. Rooster nog 10-15 min. of tot die hoender goudbruin is. Haal uit die oond uit en laat 5-10 min. rus.
6 Sny die hoender in porsies, sprinkel die pietersielie oor, en sit voor saam met die suurlemoen en ’n bykos van jou keuse.