APPELTERT met AMASIKORS & BESSIESOUS
LEWER 1 MIDDELSLAGTERT (ONGEVEER 6 PORSIES) BEREIDING: 20 MIN. / VERKOEL: 45 MIN. / GAARMAAK: 45 MIN.
Amasi werk net so lekker in gebak, en jy kan dit selfs vir ’n tertdeeg gebruik. Die geur van amasi saam met die nartjieskil, appels en bessies is ’n wenner.
KORS
375 ml (1½ k) koekmeel + ekstra vir rol 30 ml (2 e) strooisuiker
2,5 ml (½ t) fyn sout 125 g koue botter, in blokkies gesny 125 ml (½ k) amasi
BESSIESOUS
150-200 g bevrore frambose, -aarbeie of gemengde bessies
30 ml (2 e) suiker 30 ml (2 e) suurlemoensap
APPELVULSEL
4 Granny Smithappels, geskil, ontkern en in wiggies gesny
60 ml (¼ k) suiker 60 ml (¼ k) kookwater sap en fyngerasperde skil van 1 nartjie
’n skeut suurlemoensap
AFRONDING
15 ml (1 e) ligbruinsuiker
’n klontjie botter vars bessies (opsioneel)
Voorverhit die oond tot 180 °C. Voer ’n vierkantige koekpan van 20 cm met bakpapier uit en bespuit goed met kossproei. Hou ’n vel bakpapier, en bakboontjies, droë bone of rys, byderhand.
1 Kors Meng die meel, suiker en sout in ’n mengbak. Vryf die botter met die punte van jou vingers in die mengsel in.
2 Maak ’n holte in die middel, giet die amasi daarin, en knie dit liggies tot ’n sagte deeg vorm. Maak ’n bal met die deeg en bedek met kleefplastiek. Laat die deeg 15 min. in die yskas rus.
3 Rol die deeg op ’n meelbestrooide oppervlak uit. Voer die bodem van die koekpan met die deeg uit. Voer ook die kante van die koekpan uit, ongeveer 5 cm hoog. Prik die bodem van die deeg met ’n vurk en verkoel minstens 30 min. in die yskas.
4 Sit ’n vel bakpapier bo-op die deeg en vul met bakboontjies, droë bone of rys. Bak 20 min. blind. Haal die bakpapier en boontjies of rys uit. Hou die kors eenkant.
5 Bessiesous Sit alles in ’n kastrol. Roer tot die mengsel begin kook, verlaag die hitte en laat prut tot die bessies sag is. Kneus rofweg.
6 Appelvulsel Sit alles in ’n klein kastrol, bring tot kookpunt en laat 5 min. oor lae hitte prut (die appels moenie pap kook nie). Roer af en toe.
7 Afronding Verhoog die oondtemperatuur tot 200 °C. Smeer van die bessiesous op die bodem van die tertkors. Pak die appels bo-op en sprinkel die suiker oor. Stip die vulsel met ’n bietjie botter en bak nog 10-15 min. of tot die vulsel liggies begin skroei.
8 Laat die tert 10 min. in die pan afkoel, ontvorm versigtig, sny in porsies en sit voor saam met die orige bessiesous en vars bessies, indien gebruik.