Anderste koolfrikkadel

Genoeg vir 6 – 8

Bestanddele 1 heel kopkool Frikkadelle 500 g beesmince 2 eiers geklits 1 teelepel sout ’n Halwe gerasperde ui 2 eetlepels gekapte pietersielie 1 teelepel gekapte tiemie Broodkrummels van 2 snye brood (jy kan dit sommer self rasper) 2 uie, in ringe gesny Peper na smaak Smoor 2 uie, gekap Olyfolie 410 g blik gekapte tamaties 410 g blik gekapte, geroosterde rooi soetrissie 1 teelepel gerookte paprika Suiker, sout en peper na smaak Tiemietakkies of vars basil vir garnering Metode Kool: Verwyder die buitenste blare van die kool en plaas die heel kool in ’n groot kastrol met ’n koppie water. Bring tot kookpunt en kook vir so 15 minute. Skakel die plaat af en laat die kool afkoel is. Die voorbereiding van die kool kan ook die vorige dag gedoen word. Frikkadelle: Meng al die bestanddele (behalwe die twee uie) bymekaar. Rol die mince in worsies van so 5 cm en 2 cm in deursnee. Plaas ’n koolblaar op jou broodplank en sit die mince dwars aan die een punt van die koolbaar. Vou die kante van die koolblaar in en rol op soos ’n spring roll. Herhaal met die res van die mince en koolblare. Verhit ’n bietjie olyfolie in ’n oondvaste pot. Braai die 2 uie tot goudbruin en pak die koolpakkies in rye langs mekaar bo-op die uie. Voeg ’n halwe koppie water by en sit die deksel op. Bak in die oond vir ongeveer 30 minute teen 180°C. Smoor: Braai die uie in olyfolie. Voeg die tamaties en soetrissie by. Geur met die paprika, suiker, sout en peper. Vir opdiening: Bedien die koolfrikadelle op gestoomde witrys en skep tamatiesmoor mildelik bo-oor. Garneer met tiemietakkies of vars basil.