Hallo Kuiermense
Die nuwe jaar is hier en ek kan nie wag om te sien wat 2016 alles vir ons gaan bring nie. As dit egter net ’n bietjie soos verlede jaar is, kan ek sommer baie verrassings voorspel!
Maar niemand weet regtig wat vir ons voorlê nie, al waarvoor ons kan hoop is die krag en genade om dit deur al die hoogteen laagtepunte te maak. Een ding waarop jy wel hierdie jaar kan staatmaak, is dat jou gunsteling-tydskrif steeds elke tweede week propvol interessante leesstof sal wees om jou te inspireer.
Ons wil dinge sommer op die regte noot afskop met ons nuwe rubriek, My getuienis, waarin ons lesers die geleentheid gee om in hul eie woorde te vertel hoe God in hul lewe ingegryp het. Ons hoop hierdie stories bring hoop en vertroosting aan diegene wat dit die nodigste het en moedig ons lesers aan om hul verhale te deel en op dié manier dalk die boodskap kan bring aan iemand anders wat moed verloor het.
Hierdie uitgawe skiet glad nie tekort aan inspirerende booskappe nie. Bianca Botha (bladsy 16) se storie wys dat geen situasie ooit te desperaat is om uit te ontsnap nie terwyl William Smith en Jody Clarke ons weer leer hoeveel jy kan regkry met ’n positiewe ingesteldheid.
Soos gewoonlik met ons eerste uitgawe van die jaar het ons hope raad vir ouers en kinders wat terugkeer skool toe. Ook ons beeldskone voorbladgesig, Mej. SuidAfrika Liesl Laurie, vertel ’n inspirerende verhaal van hoe sy destyds skoolboelies moes oorkom en haar selfbeeld moes herbou om bo uit te kom. Sy het uiteindelik die boelies verkeerd en haarself reg bewys en wil vandag hierdie positiewe boodskap aan ander jong meisies oordra. Kom ons maak ook ’n punt daarvan om positiwiteit oor ons kinders uit te spreek!
Tot volgende keer,