10 vrae wat almal Vra
Ouers wil net die beste hê vir hul kinders. Hier is raad om vir hulle die beste onderrig te verseker.
1. Moet my kind in Engels skoolgaan om Engels te leer? Nee, jou kinders kan in hul moedertaal skoolgaan en Engels as ’n vak neem en só Engels leer. Kinders wat in hul moedertaal onderrig word, leer Engels (of ’n tweede taal of derde taal) baie makliker aan as diegene wat nie in hul moedertaal leer nie. Die suksesresep is om die kinders in hul sterkste taal te laat leer, want dit stel hulle in staat om ’n tweede of derde taal vinnig te bemeester. Aan die begin sal hulle dalk die tale ’n bietjie meng, maar dis ’n fase wat vinnig verbygaan.
Het jy geweet?
• Basiese konsepte wat die boustene vorm vir doeltreffend leer later, word die heel beste deur moedertaalonderrig vasgelê.
• As jy verstaan wat jy lees, is dit soveel makliker om dit oor te dra aan ander en vrae te beantwoord. • Dit verbeter die vermoë om ander tale aan te leer en bevorder dus veeltaligheid.
2. Is dit nie beter om my kind eerder in Engels groot te maak, sodat sy/hy Engels ordentlik kan praat nie?
Kinders wat nie in hul moedertaal leer nie, het meer moeite in ’n veeltalige omgewing. As jou moedertaal sterk ontwikkel is, kommunikeer jy dikwels beter in ’n tweede of selfs derde taal. Kommunikasievaardigheid in meer as een taal kom handig te pas in enige werksomgewing.
Het jy geweet?
• Moedertaal en veeltaligheid gaan hand aan hand, want dis juis moedertaalonderrig wat veeltaligheid moontlik maak.
• Die sukses van die leer van ’n tweede of derde taal hang af van die sukses waarmee jy jou moedertaal bemeester het.
3. Afrikaans op tersiêre vlak is onder druk en word nog net by die Noordwes-Universiteit se Potchefstroomkampus, Stellenbosch, Vrystaat, Pretoria en Akademia gebruik. Maak dit sin om jou kinders na ’n Afrikaanse skool te stuur?
Kinders wat in hul moedertaal skoolgaan en Engels as vak neem, praat uiteindelik ’n baie goeie huistaal én Engels. Omdat hulle in hul moedertaal skoolgaan, presteer hul beter en kry makliker toegang tot ’n universiteit. Omdat hulle in hul moedertaal geleer het, het hulle ’n dieper begrip en vaar hulle in die algemeen beter op universiteit.
Het jy geweet?
• Leerders wat onderrig word in die taal waarin hulle die vaardigste is, vaar die beste omdat hulle die hoër-orde-vrae
begryp.
• Daarteenoor struikel leerders wat nie in hul moedertaal leer nie met vrae soos “verduidelik in jou eie woorde … wat is jou mening oor … wat dink jy sal die gevolg wees as …”Hierdie is vrae en antwoorde wat tydens naskoolse studie van onskatbare waarde is.
• Leerders wat hul moedertaal onder die knie het, leer Engels soveel makliker aan en dra hierdie veeltaligheid juis by tot beter begrip van ander.
4. Gee ek my kind ’n voorsprong deur hom/haar in ’n Engelse klas te plaas?
Kinders leer stadiger in ’n taal wat nie hul moedertaal is nie. Hulle onderpresteer en ontwikkel dikwels ’n agterstand wat hulle nooit inhaal nie. Kinders wat in ’n tweede taal skoolgaan, word dus juis benadeel. Dit is dikwels vir ouers en familielede moeiliker om die kinders met hul skoolwerk te help.
Het jy geweet?
• Basiese konsepte wat die boustene vorm vir latere doeltreffende leer, word die heel beste deur moedertaalonderrig vasgelê.
• As jy verstaan wat jy lees, is dit soveel makliker om dit oor te dra aan ander en vrae te beantwoord.
• Dit help om die volhoubare ontwikkelingsdoelwitte te behaal.
5.Verwar dit my kind as hulle meer as een taal moet leer?
Nee wat! Dit is al oor en oor bewys dat kinders maklik meer as een taal aanleer terwyl hulle grootword. Dit is die beste om die kinders in hulle sterkste taal te laat skoolgaan, want dit stel hulle in staat om ’n tweede of derde taal vinnig te bemeester. Dis nietemin makliker vir die ouer om die kind in die moedertaal groot te maak.
Het jy geweet?
• Wanneer ’n onderwyser klas gee in ’n kind se moedertaal lei dit tot entoesiasme, kreatiwiteit, buigsaamheid en innovasie.
• Moedertaalonderrig lei tot emosionele stabiliteit sodat die kind akademies uiteindelik beter vaar.
6. Benadeel ’n aksent my kind?
Nee. Enige twee- of veeltalige persoon het ‘n aksent.‘n Aksent is geen aanduiding van ’n persoon se taalvaardigheid nie.
Het jy geweet?
• Moedertaalonderrig dra by tot selfvertroue en selfwaarde en bevestig kulturele identiteit.
• Moedertaalonderrig help kinders om vinniger die akademiese kennis op hul leefwêreld toe te pas.
• Moedertaalonderrig bevorder entoesiasme en kreatiwiteit omdat ’n kind hom- of haarself gemaklik kan uitdruk.
7. Is dit waar dat kinders in Engelse skole beter vaar as kinders in ander skole?
Die statistiek sê iets anders. Kinders wat in hul moedertaal leer, presteer beter.
Het jy geweet?
• Kennis en begrip is maklik oordraagbaar tussen tale. Wanneer ’n kind iets in sy/haar moerdertaal regtig verstaan, verstaan hulle dit in enige taal.
8. Ek praat nie standaardof‘keurige’Afrikaans nie en ek wil hê my kind moet ten minste een taal ordentlik praat.
Jou taal is wie jy is. As jy dit verwerp, dan verwerp jy jou identiteit. Hoe jy ook al jou taal praat, dit is JOU taal en die taal waarin jou kind die beste en maklikste gaan leer!
Het jy geweet?
• Suid-Afrika se verdelende verlede het ons gelaat met ’n taalerfenis wat neig om moedertaal gelyk te stel aan agterlikheid en tradisionalisme en vergeet ons dikwels dat dit die gebrek aan geleenthede is wat konflik en onverdraagsaamheid veroorsaak, nie die taal nie.
• Jou moedertaal dra by tot jou selfvertroue en selfwaarde en bevestig kulturele identiteit.
• Om jouself in jou moedertaal uit te druk, maak veeltaligheid moontlik en maak uiteindelik die wêreld vir jou oop.
9. Ons praat verskillende tale in ons huis. Watter een is die moedertaal?
Kinders kan verskillende tale wat in ’n gesin gebruik word vanaf ’n vroeë stadium onderskei en word nie daardeur verwar nie. Die skielike uitsluiting van een van daardie tale sal hulle eerder verwar. Dit gee kinders juis ’n gevoel van uitsluiting uit die familie, wat hulle selfvertroue kan benadeel. Laat leer jou kind in sy of haar sterkste taal!
Het jy geweet?
Jou moedertaal is:
• Die taal wat jy eerste geleer het.
• Die taal wat jy die beste verstaan.
• Die taal wat jy die meeste gebruik.
10.Waarom is moedertaalvaardigheid so belangrik?
Iemand wat hom-/haarself goed kan uitdruk, is meer selfversekerd.‘n Kind wat twee tale magtig is, het nog meer selfvertroue, aangesien vaardigheid in twee tale voordelig is in ’n multikulturele land soos Suid-Afrika – in die werksplek en op sosiale vlak.
Het jy geweet?
Veeltalige kinders:
• Het meer geleenthede in Suid-Afrika en in die wêreld.
• Is onbevooroordeeld en meer ontvanklik vir verskillende kulture en perspektiewe.
• Het ’n meer praktiese ingesteldheid, omdat hulle die vermoë het om deur kommunikasie ander mense te help.