Hier is die SomerCombo-resepte met die korrekte foto’s en ontbrekende bestanddele (waar van toepassing).
1. MIKROGOLFOONDSJOKOLADEKOEK Lewer 1 koek BESTANDDELE
180 ml (¾ k) botter 190 ml donkerbruinsuiker 3 eiers 175 g bruismeel (selfraising flour) 180 ml (¾ k) kakaopoeier 250 ml (1 k) melk of ongegeurde jogurt
VULSEL
75 g botter 175 g versiersuiker 50 g donkersjokolade, gesmelt 15 ml (1 e) melk
VERSIERING
Kakaopoeier Vars bessies Gekapte sjokolade ’n Paar kruisementblare
METODE
Smeer een mikrogolfbestande koekpan en voer die bodem met bakpapier. Room die botter en die suiker saam tot glad. Klits die eiers een vir een by. Sif die meel en die kakaopoeier saam, vou dit in die bottermengsel in en wissel dit af met die melk of jogurt. Skep die mengsel in die voorbereide koekpan. Plaas dit op ’n omgekeerde piering in die mikrogolfoond op ”hoog”vir 8 minute of tot die koek van die kante af trek, maar nog vogtig is binne. Laat staan die koek vir 1 minuut en keer dit uit. Verwyder die bakpapier en laat die koek afkoel. Sny die koek horisontaal in twee dele.
VULSEL:
Room die botter en suiker saam tot sag. Klits die gesmelte sjokolade en melk deur en smeer dit oor die onderste helfte van die koek. Plaas die ander helfte bo-op.
VERSIERING:
Strooi kakaopoeier oor die bokant van die koek en versier met die vars bessies, gekapte sjokolade en kruisementblare.
2. PYNAPPELYSKASTERT Genoeg vir 6 – 8 BESTANDDELE
1 pakkie tennisbeskuitjies 1 pakkie pynappeljellie 1 koppie kookwater 1 koppie room 1 x 250 g houer gladde maaskaas (smooth cottage cheese) 2 eetlepels suurlemoensap 1 x 390 g blik kondensmelk 1 x 400 g blik verpulpte pynappel 1 eetlepel Maizena
METODE
Pak die tennisbeskuitjies onder in ’n vierkantige of reghoekige tertbord of glasbak. Los die jellie in die kookwater op en laat effens afkoel. Klits die room styf en roer die maaskaas, suurlemoensap en kondensmelk by. Meng dit met die jellie en giet bo-op die koekielaag. Plaas in die yskas tot heeltemal gestol. Dreineer die pynappelpulp – behou die sous. Giet die sous in ’n kastrolletjie en kook ’n bietjie af. Meng die Maizena met n bietjie koue water en roer by die sous. Roer totdat die sous begin dik word. Laat afkoel en meng met die pulp. Skep bo-op die gestolde tert en plaas terug in die yskas.
3. TIRAMISUBLOKKE Lewer ongeveer 16 – 20 blokke (afhangende van die grootte) BESTANDDELE Vir die koeklaag
1½ koppies koekmeel ½ koppie cocoa 1 teelepel koeksoda ½ teelepel bakpoeier ¼ teelepel sout 115 g sagte botter 1 koppie suiker 2 eiers 1 teelepel vanilla essence 1¼ koppies melk 3 eetlepels koffielikeur
Vir die bolaag
1 koevertjie gelatien ¼ koppie koue water 2 x 250 g roomkaas (cream cheese) 2 x 250 g gladde maaskaas (cottage cheese) 1½ koppies versiersuiker, gesif 3 eetlepels cocoa
1 x 150 g blok donkersjokolade, fyngekap
Vir garnering
80 g blok sjokolade, gerasper 1 – 2 eetlepels cocoa
METODE
Sif die koekmeel, cocoa, koeksoda, bakpoeier en sout saam in ’n groterige mengbak. Klits die suiker en botter sag tot lig en romerig en klits die eiers en vanilla by. Voeg die melk en meelmengsel al om die beurt by die bottermengsel en meng goed. Skep die mengsel in ’n gesmeerde reghoekige koekpan van ongeveer 30 x 20 cm wat met bakpapier gevoer is (en die punte effens oorhang). Bak vir 17 – 20 minute in ’n voorverhitte oond van 180ºC. Laat die koek in die pan op ’n draaadrak vir ongveer 10 minute afkoel voordat jy dit versigtig uit die pan op die draadrak keer om heeltemal te laat afkoel. Wanneer die koek heetemal afgekoel het, plaas dit versigtig terug in die koekpan. Sprinkel die likeur oor die koek. Maak intussen die bolaag: Sprinkel die gelatien oor die water in ’n klein kastrolletjie. Laat staan totdat die gelatien gestol het. Verhit oor hitte totdat die gelatien heeltemal opgelos het. Moenie tot kookpunt bring nie. Klits die roomkaas, maaskaas, versiersuiker en cocoa saam en roer die gelatienmengsel by. Roer die gekapte sjokolade by en skep op die koeklaag. Plaas in die yskas tot heeltemal gestol en sny in blokke. Sif ekstra cocoa bo-oor en sprinkel gerasperde sjokolade bo-oor.
4. KLAPPERKARAMELTERT Genoeg vir 6 – 8 BESTANDDELE
1 pakkie karamelgeur tennisbeskuitjies, verkrummel 5 eetlepels botter, gesmelt 1 pakkie suurlemoenjellie 1 koppie kookwater 1 x 390 g blik gekarameliseerde kondensmelk (Caramel treat) 1½ koppies geroosterde klapper (sien wenk) 1 koppie styfgeklitste room Ekstra geroosterde klapper (coconut) of klapperkrulle vir garnering
METODE
Meng die koekiekrummels en die botter en stamp vas op die bodem van ’n 18 of 20 cm-losboom-quichepan. Los die jelliepoeier in die kookwater op en roer die karamelkondensmelk by. Klits goed totdat dit deeglik gemeng is. Laat staan om af te koel. Roer die klapper by en skep bo-op die kors. Plaas in die yskas totdat dit heeltemal gestol is. Skep die room bo-op en smeer mooi egalig oor die hele oppervlak van die tert. Sprinkel die geroosterde klapper of klapperkrulle bo-op.
WENK:
Maak jou eie geroosterde klapper: Giet die klapper op ’n bakplaat uit en rooster in ’n voorverhitte oond van 180ºC vir ongeveer 5 – 7 minute of totdat die klapper mooi goudbruin van kleur is.
5. HOENDER CHOW MEIN Genoeg vir 4 BESTANDDELE
2 eetlepels sonneblomolie 1 teelepel knoffel, gerasper 1 teelepel gemmer, gerasper ½ teelepel rissievlokkies 1 eetlepel Maizena 2 eetlepels sojasous 4 hoenderborsies in repies gesny 1 ui in dun ringetjies gesny 2 wortels, in baie dun repies gesny 1 groen soetrissie, in repies gesny 4 murgpampoentjies, in baie dun repies gesny 1 koppie gesnipperde pers kool 2 eetlepels heuning 3 eetlepels sojasous ’n Paar takkies koljander 2 koppies gaar eiernoedels
METODE
Marineer die hoender, knoffel, gemmer, rissievlokkies, Maizena en sojasous vir 30 minute of oornag in die yskas. Roerbraai die hoenderrepies oor hoë hitte in die sonneblomolie. Skep uit en hou eenkant. Plaas die res van die groente in dieselfde pan en roerbraai tot gaar, maar nog krakerig. Voeg nou die hoender, heuning, sojasous en koljander by, asook die gaar noedels. Roer deur en bedien dadelik.
6. SOETSUUR-VARK Genoeg vir 4 BESTANDDELE
400 g varkvleisstukkies, in blokkies gesny Sout na smaak 1 koppie bruismeel 1 eetlepel Maizena Sodawater 1 eetlepel Maizena 3 eetlepels water 1 ½ koppie pynappelsap ½ koppie pynappelstukke 1 eetlepel asyn 1 eetlepel bruinsuiker 1 eetlepel tamatiepasta ½ teelepel rissievlokkies Olie vir diepbraai Noedels of rys vir opdiening
METODE
Meng die 1 eetlepel Maizena en die 3 eetlepels water tot glad en opgelos. Plaas die pynappelsap, asyn, bruinsuiker, tamatiepasta en rissievlokkies saam in ’n klein potjie. Bring tot kookpunt. Roer die Maizena mengsel by en roer tot glad en verdik. Voeg ½ koppie pynappelstukke by die sous en hou eenkant. Verhit genoeg olie vir diepbraai in ’n pot. Geur die vleisblokkies liggies met sout. Meng die bruismeel en Maizena. Roer net genoeg sodawater by om ’n beslag te vorm wat soos dik room lyk. Dip die vleisblokkies in die beslag en diepbraai ’n paar stukkies op ’n slag tot goudbruin. Dreineer op kombuispapier. Skep die varkvleisstukkies in ’n bakkie en skep die sous bo-op. Bedien met rys of noedels.