Ontdek dié juweel in die heuwels
Mapungubwe Nasionale Park is een van die mooiste gedeeltes van die land en ook waar die storie van een van Afrika se grootste koninkryke ontvou.
Om net deur die hekke van die Mapungubwe Nasionale Park in Limpopo – geleë op die grens van Suid-Afrika, Zimbabwe en Botswana – te ry, is ’n belewenis.
Wild soos olifante, kameelperde, wildebeeste, zebras en apies begroet jou teen die asemrowende landskap van massiewe kremetartbome (baobab). Dié ikoniese bome is ook bekend as“onderstebobome”omdat hul takke soos wortels teen die hemelruim uittroon. Die bome kan enorm groot word en tot 40 mense kan in die stam pas. Koolstofdatering het bewys dat kremetartbome tot 3 000 jaar oud kan word!
In Desember 1932 het Ernst van Graan, sy seun Jerry en drie ander mans op die plaas Greefswald – waar Mapungubwe en K2 geleë is – gesoek na ’n heilige heuwel waar die skat van konings weggesteek was. Hulle het op een van die belangrikste ontdekkings van die Ystertydperk in Suidelike Afrika afgekom. Dit is op dié heuwel waar ’n klein goue renoster in ’n koninklike graf gevind is. Die goue renoster is ’n bewys dat daar gesofistikeerde goudwerk in Afrika-kulture sover as 1 000 jaar gelede was. Die museum en die interpretasiesentrum in die park vertel die hele verhaal met uitstallings of artifakte wat op die heuwel gevind is, ’n kort stappie tot by ’n uitkykpunt met asemrowende uitsigte van die beroemde gebied.
Aktiwiteite
Jou kuier by Mapungubwe sal vol wees van aktiwiteite wat jou in ’n heel ander denkwyse gaan plaas en jou siel ten volle gaan herlaai.
Besoek die samevloei van die Shashe- en Limpopo-rivier om te sien waar drie lande – Suid-Afrika, Zimbabwe en Botswana – ontmoet.
Besoek die museum (R55 per besoek). Gaan op die Erfenistoer van twee ure (R230), waar jy die geleentheid kan kry om die antieke begraafplaas bo-op Mapungubwe-heuwel te sien. Kry ’n fassinerende kykie in die lewens van die mense wat hulle destyds bo-op en rondom Mapungubwe-heuwel gevestig het. Dié gebied is bekend as die middelpunt van Suidelike Afrika se eerste inheemse koninkryk. Dit het floreer as gevolg van handel met die Indiese Oseaan-netwerk.
Gaan op ’n wildbesigtigingstoer teen sonsondergang of in die nag buite normale hektye. en beleef diere in hul natuurlike omgewing.
Geniet ’n boomtoptoer en besigtig die omgewing uit ’n ander oog.
Ervaar ’n bosbraai (R650) aan die einde van ’n wildsbesigtigingstoer. Die braai kyk uit oor ’n dam en is omring deur brandende lanterns, die geluide van die bosveld en diere in die verte – iets wat min mense al in hul leeftyd beleef het. Leokwe-kamp is ook beskikbaar vir klein troues en en spesiale geleenthede.
Daar is ook begeleide staptoere te voet vir groepe van tot agt persone.
VERBLYF EN GERIEWE
Leokwe-kamp, in die oostelike seksie van Mapungubwe Nasionale Park, in ongeveer 11 km van die hek geleë.
Die kamp bied ’n wye verskeidenheid verblyfgeriewe, insluitend ’n gesinskothuis met twee slaapkamers met twee enkelbeddens vanaf R2 135 per dag, asook ’n eenslaapkamerkothuis met twee enkelbeddens vanaf R1 345 per dag. Elke chalet het lugreëling, ’n buitestort, ’n voorkamer met ’n slaapbank en die meeste het ’n TV, ’n eetkamer en groot stoep met braaigeriewe. Die buitestort gee dit ’n egte buitelug-bosveld gevoel. Die chalets is ten volle toegerus met kombuistoebehore noodsaaklik vir self-
sorgverblyf, onder meer ’n yskas, borde, potte en eetgerei. ’n Pragtige gemeenskaplike swembad rond die prentjie perfek af. Die groot, onomheinde chalets grens aan rotsagtige heuwels wat die tuiste is van eekhorings en bokke.
Daar is nog vier ander kampe: Limpopo Forest-tentkamp, Tshugulu Lodge, Vhembewilderniskamp en Mazhou-kampterrein.
RUS EN STILTE
Leokwe-kamp bied aan besoekers rus en vrede, want daar is geen selfoonontvangs of wifi beskikbaar nie. Daar is wel opvangs by die opvoedkundige sentrum, die samevloei en hoofontvangs. Jy mag ook dalk ’n sein optel by die hoogste plekke tydens begeleide staptoere.
Maak seker jou petroltenk is vol en dat jy genoeg voorrade het aangesien daar geen winkel of vulstasie in die park is nie. Die naaste dorp, Mussina, is sowat 75 km van die park geleë.