TUNAKERRIE
WENK: Jy kan gewone of jasmynrys ook gebruik. Bruin rys sal net so goed werk as jy ’n meer veselryke opsie verkies.
Genoeg vir 4 BESTANDDELE
3 eetlepels olie 1 groot ui, fyngekap 1 rooi brandrissie, naatjies en pitjies verwyder en fyngekap 1 knoffeltoontjie, gekneus en fyngekap 1 x 3 cm-stuk vars gemmer, geskil en gerasper of baie fyn gekap 1 van elk groen, rooi en geel soetrissie, witgedeeltes en pitjies verwyder en in repies gesny 2 – 3 teelepels matige kerriepoeier ½ koppie hoenderaftreksel 3 koppies gaar basmati-rys 2 x 185 g-blikkies tuna, gedreineer Sout en varsgemaalde swartpeper na smaak ’n Handvol varsgekapte koljander Geroosterde amandelvlokkies vir garnering
METODE
Verhit die olie in ’n swaarboompan of -kastrol en braai die uie daarin tot sag en deurskynend. Voeg die soetrissie, knoffel, brandrissie en gemmer by en braai vir nog ’n paar minute totdat die groente begin sag word. Roer die kerriepoeier en die aftreksel by en laat vir 5 minute liggies prut. Voeg die rys en tuna by en meng goed. Laat vir 5 – 7 minute lank liggies kook totdat alles deurwarm is. Geur met sout en peper en roer die koljander deur. Skep uit in ’n mooi opdienbak en sprinkel die amandelvlokkies bo-oor.