Vra Dr. Genine
Soek jy raad oor ’n mediese probleem?
Vraag IMPLANT IN MY ARM
Ek is 18 en het ’n implant in my arm. Vandat ek dit in het, kry ek my maandstonde onophoudelik, maar die implant pla my nie. Ek eet verskriklik baie, maar tel nie gewig op nie. Ek was al by die kliniek. Hulle gee my net voorbehoedpille. Wat moet ek doen? BEKOMMERD
Antwoord BESTE BEKOMMERD
Die implant is een van die nuutste metodes van voorbehoed, wat gratis beskikbaar is by staatsklinieke.
Dit is ’n plastiese“draad”wat kleiner as ’n vuurhoutjie is. Dit word gewoonlik onder die vel aan die onderkant van die linkerboarm geplaas deur ’n opgeleide dokter of verpleegster. Die area sal eers verdoof word en dan sal die implant met ’n steriele applikator onder die vel geplaas word. Dit kan dalk met pyn, swelling of rooiheid gepaard gaan. Jy kan pynpille drink, maar as dit nie help nie moet jy weer advies by die dokter of verpleegkundige kry wat dit ingesit het. Die implant is onmiddellik effektief as dit voor dag 5 van die maand
stondesiklus of voor dag 21 ná geboorte geplaas word. Dit mag enige ander tyd ook geplaas word, maar maak seker jy is nie reeds swanger nie. Gebruik addisionele voorkoming in die eerste sewe dae ná die plasing.
Die implant bevat die hormoon progestogeen. Dié hormoon word normaalweg deur die eierstokke vervaardig as deel van die menstruele siklus. Dit voorkom vrystelling van eiertjie(s) (ovulasie), verdik die mukus in die serviks (mond van die baarmoeder) en verdun die lining van die baarmoeder. Dit voorkom dat bevrugting plaasvind. Die implant is meer as 99% effektief en op die oomblik is dit die mees effektiewe voorbehoedmetode. Geen metode is 100% effektief nie – ook nie sterilisasie nie.
Die implant is effektief vir drie jaar en kan ge-woonlik deur die meeste vroue gebruik word. Jonk en oud – al het jy kinders of nie, selfs vroue wat borsvoed of hoë bloed, suikersiekte, MIV en hartsiektes het. Vroue wat borskanker of erge lewersiektes het, mag nie die implant gebruik nie. Sommige medikasies soos anti-epileptiese pille, TB-medikasie of sekere antiretrovirale (medikasie vir die behandeling van MIV/vigs) kan die implant minder effektief maak. In sulke gevalle word kondome aanbeveel vir ekstra beskerming.
Ná die verwydering van die implant, is daar geen wagperiode om na normale vrugbaarheid terug te keer nie. Daar is geen roetine opvolgbesoeke ná die pla- sing van die implant nie – net ná drie jaar om dit te vervang.
Die implant is ’n goeie keuse vir vroue wat ’n veilige, betroubare en omkeerbare voorbehoedmiddel wil gebruik.
Die newe-effekte is nie dieselfde vir almal nie. Die implant stel ’n konstante, lae dosis progestogeen vry en die lae dosis verminder die erge newe-effekte wat gewoonlik met ander voorbehoedmiddels gepaard gaan. Dit klink of jy van die newe-effekte ervaar. Die algemeenste neweeffek is die verandering in die maandstondepatroon. Dit kan meer of normaal, baie min en ongereeld en selfs afwesig wees. Ander newe-effekte by hormoonbehandeling is naarheid, maagkrampe, duiseligheid, hoofpyne, teer borste, aknee, haarverlies, opgeblase gevoel, toename in gewig en selfs vaginale irritasie of afskeiding. Die verlies van baie bloed (tydens menstruasie) kan lei tot bloedarmoede wat as duiseligheid of moegheid voorkom.
Jy sê nie vir hoe lank jy die implant gebruik nie. ’n Dokter of verpleegkundige moet ’n deeglike geskiedenis van jou neem, ondersoek en toetse aanvra om ander oorsake uit te skakel oor hoekom jy nie gewig optel nie. Indien die voorbehoedpille nie jou maandstonde verminder nie, vra vir ’n ginekologiese ondersoek deur ’n dokter. Vra vir ’n ver-wysing by die gesinsbeplanningskliniek vir die ginekoloog.
Die implant is ’n goeie keuse vir vroue wat ’n veilige, betroubare en omkeerbare voorbehoedmiddel wil gebruik.