gaan op safari
Ontspan in gerief in die bos en besigtig wild van naderby in die Mopani-kamp by die Kruger Nasionale Park.
’nTrop olifantkoeie met hul kalfies wei net enkele meters van die roete wat lei na die Mopanikamp. Getrou aan hul rol as versorgers en beskermers, hou hulle ’n wakende oog oor die omliggende bosse vir enige bedreiging vir hul kalfies. Eenkant drentel ’n olifantbul onrustig rond, angstig vir ’n kans om by een van die olifantkoeie aan te lê.
Omtrent ’n kilometer weg is twee kameelperde speels besig om met hul nekke ’n grasieuse paringsdans uit te voer.
’n Ontspannende rit
Ons bevind ons in die noordelike deel van die Kruger Nasionale Park, op pad na die Mopani-ruskamp, geleë naby die grens tussen Suid-Afrika en Mosambiek in die Limpopo-provinsie. Die kamp is ’n baie gewilde bestemming vir toeriste en natuurliefhebbers en as jy gelukkig is, kan jy die Groot Vyf al te siene kry kort nadat jy deur die Phalaborwa-hek is, sowat 75 km van die kamp.
Die skilderagtige roete na die Mopaniruskamp bied nie net pragtige natuurskoon nie, maar ook ’n oorvloed ander bekende diere om te besigtig soos sebras, wildsbokke en vlakvarke. Genoeg om diereliefhebbers na hul asems te laat snak en safari-groentjies na Google te dryf om die diere te identifiseer!
’n Algemene gesig is kameelperde wat aan bome se boonste blaartjies knibbel, troppe wildebeeste wat hul dors in die Letaba-rivier les of renosters wat in die son baai.
Die kamp is geleë in ’n deel van die Kruger Nasionale Park wat oorheers word deur struikagtige plantegroei en mopaniebome, wat die grootste deel van olifante en mopaniewurms se dieet uitmaak.
Die kamp bied ook ’n asemrowende uitsig oor die Pionierdam wat ryk is aan voëllewe en ’n paradys vir voëlkykers is.
Gerieflike verblyf
Die ingang tot die kamp is baie verwelkomend en die area is afgesper van die res van die park om onwelkome nagtelike besoekers uit jou hut of kothuis te hou.
Daar is ’n verskeidenheid akkommodasie beskikbaar en almal is toegerus met die nodige geriewe om gerieflike verblyf te verseker, soos elektrisiteit, lugversorging en braaigeriewe.
•
Die akkommodasie-eenhede kan onderskeidelik van 2 tot 8 persone huisves en het rietdakke, klipmure en -plaveisel wat perfek met die bosveldomgewing saamsmelt. Elke eenheid het ’n kombuis, toegerus met eetgerei, breekware en kookgerei, asook ’n vrieskas in elkeen en mikrogolfoond in sommige. Afhangend van die tipe akkommodasie wat jy kies, sal die kombuis binne die eenheid self of buite op die stoep wees. Elke eenheid het ’n stort of bad met lopende warm water. Die groter eenhede het ook ’n sitkamer met ’n TV. •
Die gastehuis bestaan uit vier aparte eenhede, elk met slaapplek vir twee persone. Dit het ’n aparte sitkamer/TVkamer, eetkamer, kombuis, braai-area en ’n sentrale punt waar ’n gesellige bosveldvuur saans gemaak kan word. Dit is omhein om privaatheid te verseker en is die grootste akkommodasie-eenheid in die kamp. •
Boulders is ’n groot rietdakhuis met baksteenmure wat ’n in-die-bos-gevoel verseker, maar met al die geriewe waaraan jy gewoond is. Dit bestaan uit enkel- en dubbelslaapkamers, badkamers, ’n volledig toegeruste kombuis met toebehore, sitkamer, eetkamer, kroeggeriewe en ’n stoep