Reg vir roerbraai

As jy nie nog lus is vir lang dinge nie, is hierdie roerbraai ’n fantastiese dis om jou gesin se magies vol te maak.

BEEF-EN-MIELIEROERBRAAI Genoeg vir 4 BESTANDDELE

400 g beesvleisrepies 1 eetlepel sesamolie 3 knoffeltoontjies, gekneus en fyngekap 1 x 3 cm knoets vars gemmer, geskil en fyngekap 1 rooi brandrissie, pitjies en naatjies verwyder en fyngekap 1 kleinerige kop broccoli, in klein blommetjies gebreek 10 – 12 dwergsoetmielies, effens kleiner gesny 1 koppie beesvleisaftreksel 1 x 100 g-pakkie eiernoedels 2 eetlepels sojasous Sout en varsgemaalde swartpeper na smaak 3 stingeluie (spring onion), in dun ringetjies gesny vir garnering

METODE

1. Plaas die beesvleisrepies, sesamolie, knoffel, gemmer en brandrissie saam in ’n bak, meng goed en laat staan vir ongeveer 15 minute. Gebruik die wagtyd om jou ander bestanddele gereed te kry. Kook die eiernoedels volgens die aanwysings op die pakkie, dreineer goed en hou eenkant. 2. Verhit ’n wok of ’n groot pan oor hoë hitte en roerbraai die beesvleisrepies vir ongeveer 3 minute. 3. Voeg die broccoli en dwergmielies by en roerbraai vir ’n minuut of twee. Voeg die aftreksel bietjie vir bietjie by en roerbraai vir ongeveer 5 minute. Voeg die noedels by en roerbraai tot goed gemeng. 4. Voeg die sojasous by en geur met sout en peper. Wees net versigtig met die sout – die sojasous is reeds souterig. Garneer met die stingelui en bedien onmiddellik. Die geheim van roerbraai is om al jou bestanddele voor te berei en in bakkies voor jou gereed te hê vir die bygooislag. Meet alles af en kap, sny jou groente en goeters en kook jou noedels. Wanneer jy eers die pan aan die gang het, gebeur alles baie vinnig.