Dr. Genine
Soek jy raad oor ’n mediese probleem?
Vraag HET NIE LUS NIE
Ek is 60 jaar oud. Ek en my man hou van seks, maar ek kry nie gevoelens nie. Ek is droog. Gee tog raad. Ek voel skaam as ek sê ek kry nie gevoelens nie. Wat kan ek gebruik om gevoelens te kry? Help asseblief.
HULPELOOS Antwoord BESTE HULPELOOS
Dit is ’n algemene probleem wat mans en vroue raak, maar nie maklik is om oor te praat nie. Ons noem dit jou libido of sekslus. Daar is baie redes hoekom jou sekslus kwyn of afwesig is. Jy moet glad nie skuldig of sleg voel nie, want baie oorsake is buite jou beheer.
HORMONE: Om lus te wees vir seks en dit te geniet, moet jou hormone in balans wees. Afhangende van die tyd van die maand of hoeveel testosteroon (die hormoon wat sekslus ondersteun) jou liggaam vervaardig, sal jy minder of meer sekslus het. Heelparty vroue in hul menopouse het minder estrogeen (dis normaal) en dit lei tot vaginale droogheid.
Die vaginale wand kan ook dunner en minder soepel wees. Tydens seks kan dit brand, jeuk, soms bloei en pynlik wees.
RAAD: Gebruik vaginale smeermiddels wat jy sonder ’n voorskrif kan koop. Vermy smeermiddels met ’n petroleumbasis en gebruik ’n smeermiddel met ’n silikoonbasis.
Replens is ’n nie-estrogeen-vogmiddel wat die vaginale weefsel help herbou en lubrikasie tydens seks vermeerder. Indien die ginekoloog dit aanbeveel, mag jy ’n estrogeenvaginale smeermiddel gebruik. (Dié raad is veral vir vroue wat sekere kankers het wat medikasie gebruik om hul estrogeenvlakke te verminder.)
Moenie die fout maak om jou sekslewe te vergelyk met wat jy op televisie sien nie – dis nie altyd waar nie en dan streef jy iets na wat glad nie haalbaar is nie. Dit kan lei tot meer frustrasie en dan word dit ’n bose kringloop.
SIEKTES: Sekere siektetoestande kan ook jou lus verminder. Goeie sirkulasie en gesonde senuwees wat werk, is nodig vir goeie sekslus. Diabetes kan dit belemmer en die beheer van jou diabetes is baie belangrik. Depressie, angstigheid, onderaktiewe skildklier en anemie kan ook jou sekslus demp.
Ander siektes wat baie pyn tydens seks veroorsaak, is endometriosis, fibrome en artritis.
RAAD: Besoek jou huisdokter of kliniek om hierdie siektes uit te skakel.
MEDIKASIE: Daar is navorsing wat bewys dat sekere medikasie jou sekslus kan verminder, soos byvoorbeeld die pil wat ’n hormoon-voorbehoedmiddel is. Daar is ander metodes van geboortebeperking soos middels wat binne-in die baarmoeder geplaas kan word. Party vroue gebruik hormoonpille vir die simptome van
As jou sekslus kwyn of afwesig is, is dit belangrik vir julle albei om aan hierdie“probleem” te werk en saam ’n oplossing te kry.
menopouse en dit kan sekslus verminder. In sulke gevalle, kan jy jou leefstyl verander deur minder kaffeïen, suiker en alkohol te gebruik, te oefen en ’n goeie slaappatroon te hê.
Sekere anti-depressante kan ook sekslus verminder. Bespreek dit met jou psigiater of psigiatriese verpleegster om dit te verander. Moenie self probeer om die pille ongereeld te gebruik nie, want die chemiese behandeling van die depressie sal dan nie effektief wees nie. Sekere medikasies vir hoë bloeddruk en anti-histamiene kan ook
sekslus demp. SIELKUNDIGE EN SOSIALE REDES: Verhoudingsprobleme, gebrek aan kommunikasie, trauma in die verlede, geen privaatheid, stres, moegheid, min selfvertroue, verveeldheid, min intimiteit, alkohol- en dwelmmisbruik kan ook ’n negatiewe effek op sekslus het.
Nuwe ma’s kan oorweldig word met al die nuwe verantwoordelikhede en dit kan bydra tot ’n verminderde sekslus.
Dis belangrik om duidelike grenslyne vir die slaapkamer te hê. Los ook jou jou foon, TV en rekenaars buite jou slaapkamer. Dit kan ’n groot sekslusdemper wees. Dit is belangrik om te onthou dat seks ’n “vennootskap”is met jou metgesel. As jou sekslus kwyn of afwesig is, is dit belangrik vir julle albei om aan hierdie“probleem”te werk en saam ’n oplossing te kry. Berading is een van die maniere om dit te doen.