Hoofkos: Maak smullekker bredies met ’n twist

Verdryf die winterkoue met ’n heerlike pot bredie. En as jy so ’n bietjie moeg geraak het vir die gewone bredieresepte kan jy gerus hierdie disse probeer. Dit lyk op die oog af doodgewoon, maar daardie effense kinkel gee dit ietsie wat jou sal verras. Deu

ITALIAANSE FRIKKADELBREDIE

Genoeg vir 4 BESTANDDELE

Frikkadelle

500 g mince 1 sny brood 1 klein ui, fyngekap of gerasper 1 knoffeltoontjie, gekneus en fyngekap 1 eetlepel tamatiepasta ½ rooi soetrissie, wit gedeeltes en pitjies verwyder en baie fyn gekap 1 teelepel droë origanum Sout en varsgemaalde swartpeper 1 eier, effens geklits ½ koppie koekmeel

Brediemengsel

3 eetlepels olie 3 middelslaguie, fyngekap 3 knoffeltoontjies, gekneus en fyngekap 3 koppies groenbone, gekerf 1½ rooi soetrissie, wit gedeeltes en pitjies verwyder en in repe gesny 1 x 400 g-blik tamaties, geskil en gekap ’n Handvol vars origanum, gekap 1 koppie beesvleisaftreksel Sout en varsgemaalde swartpeper

METODE

Frikkadelle: Plaas al die bestanddele, behalwe die koekmeel, saam in ’n groot mengbak en gebruik jou hande om dit goed te meng. Vorm frikkadelle so groot soos tafeltennisballetjies. Giet die koekmeel op ’n plat bord en rol die frikkadelle daarin. Plaas die frikkadelle op ’n bakplaat of skinkbord wat met bakpapier gevoer is. Hou die frikkadelle in die yskas terwyl jy die brediemengsel maak.

Brediemengsel: Verhit die olie in ’n swaarboompot en braai die uie. Voeg die knoffel by en braai vir nog ’n minuut of twee. Voeg die bone, soetrissie, tamatie en origanum by en kook vir so 5 – 7 minute. Voeg die aftreksel by en geur met sout en peper. Bring tot kookpunt, bedek die pot en verlaag die hitte. Laat prut vir 10 minute. Samestelling: Plaas die frikkadelle in die brediemengsel, bedek die pot en laat vir 20 minute prut.