Klimaatsverandering: Só word die aarde té warm
Die aarde word ál warmer en dit laat ons almal in ’n penarie. Aardverwarming het verskriklike slegte nagevolge vir alle lewende spesies en die voortbestaan van ons planeet. Hier is alles wat jy moet weet.
Het jy al gewonder hoekom die weer deesdae so deurmekaar is? Seisoene is nie meer dieselfde nie, daar is droogtes, oorstromings en selfs ysbere wat verdrink! Dít is alles as gevolg van aardverwarming of klimaatsverandering. Aardverwarming (global warming) verwys na die spoed waarteen die aarde se gemiddelde temperatuur styg en die gevolge daarvan. Die aarde het in die vorige eeu met gemiddeld 1°C warmer geword en hoewel dit nie soos baie klink nie, sal die veranderende klimaat ons weerstoestande baie meer onvoorspelbaar maak. Soos temperature styg, sal sommige gebiede natter of droë word en baie diere (en mense) gaan dit moeilik vind om aan te pas.
WAT VEROORSAAK DIT?
Te veel koolstofdioksied in die atmosfeer is die grootste oorsaak van aardverwarming. Koolstofdioksied in die lug is egter noodsaaklik vir alle lewe, want plante gebruik dit tydens fotosintese om suurstof te maak sodat ons almal kan asemhaal.
Wanneer koolstofdioksied en ander besoedelende gasse in die atmosfeer vrygelaat word, vang dit baie van die hitte vas wat die aarde uitstraal nadat dit hitte van die son geabsorbeer het. Dit veroorsaak dat die aarde warmer word en dit noem mens die kweekhuiseffek. Die besoedelende gasse in die atmosfeer word al hoe meer en aardverwarming al hoe erger soos ons byvoorbeeld steenkool brand vir elektrisiteit, industriële prosesse uitlaatgasse vrystel en ons ontslae raak van plantlewe vir byvoorbeeld geboue (ontbossing).