TUNA-EN-RYSOONDSKOTTEL
Genoeg vir 6 BESTANDDELE Tunamengsel
3 eetlepels botter 1 x 250 g-houer wit knopiesampioene 1 selderystingel, gekap 1 middelslag ui, fyngekap 2 opgehoopte eetlepels koekmeel 2 koppies warm melk 1 teelepel sout ’n Knippie rooipeper 2 blikkies tuna, gevlok en gedreineer 2 koppies gaar wit rys ½ koppie cheddarkaas, gerasper
Bolaag
2 eetlepels cheddarkaas, gerasper 1/3 koppie broodkrummels 1 eetlepel botter, gesmelt
METODE
Tunamengsel: Verhit botter in ’n groterige kastrol en braai uie, seldery en sampioene daarin totdat uie sag en deurskynend is. Roer meel deur en kook vir ’n minuut of so. Haal die pot van hitte af en roer warm melk geleidelik by. Roer sout en rooipeper by. Plaas pot weer terug op stoofplaat en roer totdat sous begin dik word. Meng tuna in ’n mengbak met rys en kaas. Voeg sous by en meng goed. Skep in ’n oodvaste bak wat liggies met botter gesmeer is.
Bolaag: Meng al die bestanddele vir die bolaag en bedek die tunamengsel daarmee. Bak in ’n voorverhitte oond van 200°C vir ongeveer 30 minute of totdat die bolaag goud van kleur is.