Dr. Genine

Soek jy raad oor ’n mediese probleem?

BLOED IN STOELGANG My man pou bloed. Wat kan dit wees, asseblief. BEKOMMERD BESTE BEKOMMERD Wanneer ’ n mens bloed met jou stoelgang passeer, kan die bloeding van enige gedeelte van die spysverteringskanaal ontstaan. Die kleur van die bloed kan min of meer aandui waar dit ontstaan, en sodoende ook na die moontlike oorsaak. Helderrooi of maroen gekleurde bloed in die stoelgang kom gewoonlik van die onderste gedeelte van die spysverteringskanaal (die anus, rektum, dikderm (kolon) of dunderm). Swart of teeragtige stoelgang is gewoonlik afkomstig van die boonste gedeelte van die spysverteringskanaal (slukderm, maag of dunderm).

LET WEL: Sekere groente soos beet of tamaties kan tydelike rooi stoelgang veroorsaak, en ysterpille, bismuth medisyne of bloubessies tydelike swart stoelgange veroorsaak.

Dis ook belangrik om te weet hoe lank en hoeveel bloed in die stoelgang is, en of dit gepaard gaan met ander simptome soos: maagpyn, sooibrand, braking (opgooi), hardlywigheid, diarree (los maagwerk), swakheid, kortasem, gewigsverlies en slym in die stoelgang. Wanneer u baie bloed in n kort tydperk verloor, kan dit n mediese noodgeval word wanneer u simptome van skok en bloedarm (anemie) ontwikkel – so raadpleeg dadelik u dokter of gaan na n hospitaal vir onmiddelike ondersoek en behandeling.

OORSAKE: Aambeie, ’ n skeur in die anale area, ’ n vreemde voorwerp in die anus / rektum, divertikulitis, inflammatoriese siektes (Chron’s en Ulseratiewe Kolitis), poliepe en kanker van die dikderm (kolon). Bloedvate in die anus/rektum is deel van die normale anatomie van die liggaam. Wanneer dit problematies raak deur te swel, jeuk of bloei, word dit aambeie genoem. Die swelling word veroorsaak deur drukking in die bloedvate en verskillende redes soos bv. hardlywigheid of diarree, swangerskap, oorgewigtheid, vorige operasies aan die rektum/anus, in ouer mense verswak die weefsels wat die bloedvate ondersteun, anale seksuele omgang, ruggraat beserings of kanker van die dikderm. Aambeie kan ekstern (buite), intern (binne) of afgesak (prolapsed) wees wat self terug in die anus kan gaan of sagkens teruggedruk kan word.

Divertikulitis: Divertikulose is klein, ballonagtige uitstulpings (pouches) in die dikderm, en wanneer dit onsteek, noem ons dit Divertikulitis. Die simptome sluit in abdominale pyn, koors, diarree of hardlywigheid en bloed in die stoelgang. Die gevaar is dat dit ’n abses kan vorm en wanneer dit perforeer kan dit lewensgevaarlik wees.

Chron’s se siekte is inflammasie van die spyverteringskanaal en kan enige plek tussen die mond en anus voorkom. Simptome is abdominale pyn met slymerige diarree, koors, gewigsverlies, anamia (bloedare), veluitslag, artritis, inflammasie van die oe. Die risiko bestaan van obstruksie of kanker in die dun- of dikderm.

Ulseratiewe Kolitis: dis inflammasie van die voering (lining) van die dikderm (kolon), en kan seertjies / ulkusse vorm. Simptome sluit in; slymerige diarree met rektale bloeding, geen eetlus, koors en moegheid. Soos jy kan aflei, is dit raadsaam om jou dokter of verpleegkundige te besoek vir ’ n deeglike gesondheidsgeskiedenis en ondersoek. Daar is n paar spesiale toetse wat aangevra mag word om die diagnose te bevestig: bloedtoetse om bv. te bepaal of jy bloedarm is. ’n Gastroskopie kan ook gedoen word: dit behels die “sluk” van ’ n baie klein kameratjie wat aan n dun buigbare instrument is – sodoende kan die slukderm, maagwand en eerste gedeelte van die dunderm van nader gesien word. Dis n pynlose prosedure en word met ligte verdowing deur n spesialis gedoen. n Rektale ondersoek kan gedoen ( om aambeie te ondersoek) word en u mag miskien verwys word vir ’ n kolonoskopie. Dit behels dieselfde metode as n gastroskopie, maar dit word natuurlik vanaf die anus gedoen: dit kan help om die oorsaak van helderrooi bloeding te bepaal, wat in die rektum of dikderm ontstaan.