W-KAAP DIK GETIK
Dit is veral die Wes- en Oos-Kaap wat so deur tik verniel word. En dis veral families en die gemeenskap wat ly.
Die tikduiwel is besig om sy kloue nóg stewiger in die Wes-Kaap in te slaan.
Trouens, dié provinsie is vervuil van die tik, spel lt.kol. Johan Smit, bevelvoerder van die provinsiale speurdiens: georganiseerde misdaadondersoek (narkoties), dit uit.
Nie net die hoeveelheid beslagleggings nie, maar ook die grootte van die besendings waarmee sy kantoor te doen het, dui op ’ n toename in die gebruik daarvan, beklemtoon hy. Albei het die afgelope vyf jaar toegeneem.
Vroeër jare was 2 kg tik ’ n groot saak. Deesdae lê sy kantoor beslag op besendings so groot as 52 kg en selfs 80 kg. “Dis groot hoeveelhede wat inkom en dit gaan net oor supply en demand.”
Daarmee saam is daar ook ’ n toename in die aantal mense wat vir die besit van tik in hegtenis geneem word. Volgens Smit kom gebruikers oor die hele spektrum voor wat ouderdom betref, met sommige so jonk as 11.
Word net na arrestasies gekyk, skat hy dat 17- tot 28-jariges tans die grootste gebruikers is.
Die Kaapse Vlakte is al as ’n tiknes beskryf, maar volgens Smit het hierdie dwelm lank reeds ook sy weg tot middelklasgebruikers gevind.
Word na dwelmgebruik landwyd gekyk, is dit uit data van die Mediese Navorsingsraad (MNR) duidelik dat tik hoofsaaklik in die Wes- en die Oos-Kaap gewild is.
Byna ’ n derde van alle mense wat in die laaste ses maande van verlede jaar in rehabs in die Wes-Kaap vir dwelmgebruik toegelaat is, het aangedui dat tik – oftewel metamfetamien – hul primêre dwelm van keuse is.
Die MNR monitor landwyd toelatings tot rehabilitasiesentrums deur middel van sy Sacendu-projek. In sy mees onlangse verslag blyk dit dat tik in die laaste ses maande van verlede jaar ’n styging van 27% tot 31% getoon het teenoor die vorige ses maande as die algemeenste primêre dwelm onder mense wat in Wes-Kaapse rehabs toegelaat is. Vir die Oos-Kaap was die syfer 20%.
Tik is ’n opkikker wat die brein stimuleer en die hartklop versnel.
Dit laat gebruikers energieker en wakkerder voel, gee hulle meer selfvertroue en ’ n verhoogde seksdrang.
Dit lei egter ook tot aggressie, geweld, hart- en breinskade. Psigiaters het reeds hul kommer uitgespreek oor die toename in skisofrenie en psigoses onder jong gebruikers. doen alles vir dwelms
DOEN ALLES VIR DWELMS
Soos met ander dwelms, sal tikgebruikers nie skroom om te steel of ander misdade te pleeg om voorraad te kry nie.
Wanneer tik in hofsake ter sprake is, getuig die polisie gereeld ter strafverswaring oor ’n toename in huisbrake en diefstal, terwyl landdroste al meermale uitermate hoë vlakke van geweld tydens ernstige misdade soos moord en verkragting aan die gebruik hiervan toegeskryf het.
Maar eintlik het tik vele aaklige gesigte. Dit word gesien in die hoogs aggressiewe kind wat sy ouers boelie en in voortdurende vrees laat lewe, maar ook onder tik-babas wie se derms buite die lyfie ontwikkel; die jong man of vrou met bewings en rukkings omdat hul tikgebruik Parkinson se siekte aangebring het; en onderwysers wat hande in die hare sit met ’ n generasie struktuurlose tikkinders met ernstige agterstande wat in skole op veral die Kaapse Vlakte hul opwagting maak. ’n Skoolhoof in een van die armste gebiede in die Kaap sê kinders wie se ma’s tydens swangerskap getik het, het nie net gedragsprobleme nie, maar oor die algemeen ook swakker kognitiewe vaardighede as kinders met fetale alkoholsindroom.
“Dis of hulle meer beperk is en hulle net in ’ n klas kan uitdruk deur ’ n steurnis te veroorsaak.
“Deesdae sukkel kinders selfs in die grondslagfase,” sê hy. ’ n Hoë skooluitvalsyfer onder hierdie kinders word voorspel, en ook dat baie van hulle op ’ n vroeë ouderdom in hul ma se tikvoetspore sal volg.
Joanie Fredericks, stigter van die Mitchells Plain Impact Association – wat spesifiek seksuele geweld teenstaan – sê daar is vir seker geen afname in die gebruik van tik in hulle omgewing nie.
Net die afgelope drie dae, vertel sy, het twee verskillende gesinne van Freedom Park in Tafelsig by haar kom hulp vra nadat hul seuns van onderskeidelik 18 en 17 in albei gevalle die hele huis opgesmash en gesinslede aangerand het.
“Die een meisie se broer het haar amper doodgesteek terwyl sy geslaap het. Die kinders raak verskriklik gewelddadig. As hulle nie geld kry vir tik nie of dit nie in die huis kan steel nie, is die hele wêreld deurmekaar.”
Vir haar is die hartseerste dat baie verslaafdes uitroep na hulp.
“Ek was vroeër by rehabilitasie betrokke en baie het skoongekom. Maar dan kom hulle terug na ’ n gemeenskap waar feitlik geen programme is wat hulle aan die gang kan hou.