viskerrie met klapper en pynappel
Genoeg vir 4 BESTANDDELE Vis
1 teelepel matige kerriepoeier ½ teelepel borrie ½ teelepel sout 500 g stokvis, in groterige stukke gesny
Sous
3 eetlepels olie 1 groot ui, fyngekap 2 knoffeltoontjies, gekneus en fyngekap 1 x 3 cm-knoets vars gemmer, geskil en fyngekap 1 rooibrandrissie, pitjies en naatjies verwyder en fyngekap 2 teelepels garam masala 1 teelepel borrie 2 teelepels suurdadelpasta (tamaryn) of 2 teelepels suurlemoensap 1 teelepel strooisuiker (castor sugar) Sout en varsgemaalde swartpeper na smaak 1 x 400 g-blik klappermelk (coconut milk) 4 teelepels tamatiepuree 2 koppies water 1 pynappel, geskil, stronk verwyder en in happiegrootte-stukkies gesny
METODE
Vis: Meng die kerriepoeier, borrie en sout en plaas dit in ’n plastieksak saam met die visstukkies. Skud liggies sodat die visstukkies heeltemal bedek is. Plaas in die yskas.
Sous: Verhit die olie in ’ n groot swaarboompan of -pot en braai die ui daarin totdat sag en deurskynend. Voeg die knoffel, gemmer en brandrissie by en braai liggies saam vir ’ n minuut of twee. Voeg die res van die bestanddele by en laat vir 30 minute prut. Plaas die visstukkies op ’ n bakplaat wat met bakpapier gevoer is en bak in ’n voorverhitte oond van 220°C vir ongeveer 7 minute. Skep die visstukkies in die sous en kook vir nog 5 minute saam. Haal die pot van die hitte af en laat eenkant staan vir 30 minute sodat die smake behoorlik kan ontwikkel. Plaas die pot terug op die stoofplaat en verhit oor matige hitte totdat dit weer deurwarm is en bedien op heerlike basmatirys.
WENK:
Wanneer ek water byvoeg, verkies ek om eers die water te kook. Wanneer jy koue water byvoeg, verlaag jy die hitte wat jy tot in daardie stadium opgebou het.