BELOON JOU BESTE ONNIE SKRYF SÓ IN:
Wie is jou beste onderwyser? Daardie een wat jou elke dag inspireer en ’n verskil maak? Skryf haar of hom in, want 10 onnies kan elk R2 000 kontant wen!
• Skryf ’n brief of e-pos van 150 – 200 woorde waarin jy jou beste onderwyser nomineer en verduidelik hoekom jou onderwyser verdien om op die Kuier
manier vereer te word.
• Enigeen kan ’n onderwyser inskryf. Al het jy lankal die skool verlaat, maar jou onderwyser het ’n indruk op jou gemaak en jou lewe verander, kan jy hulle steeds inskryf. Die onderwyser moet nog onderwys gee en in Suid-Afrika wees.
• Stuur jou inskrywing na Kuier en Kyknet se My Beste Onnie-kompetisie, Media24-sentrum (vyfde vloer), Heerengracht 40, Kaapstad, 8000 of e-pos dit na kuier@kuier.co.za met My Beste Onnie in die onderwerpveld.
• Die kompetisie sluit op 25 Januarie 2019 om 12:00. Die wenners word in die uitgawe van 20 Februarie aangekondig. Komaan, laat jou onnie vir ’n slag spesiaal voel, want hulle verdien dit!
Ons lewe in ’n tyd waar onderwysers nie aldag meer waardeer of gerespekteer word nie. In dié uitgawe vertel ’n paar onderwysers met wie Kuier gepraat het, oor die vlaag van geweld in skole, veral daardie wat op hulle as onderwysers gemik is. Van hulle erken hulle vrees vir hul lewe, maar dan is daar ook onderwysers wat ten spyte van uitdagings, steeds elke dag opstaan om die leiers van môre op te voed sodat hulle gereed kan wees vir die “grootmenswêreld”.
Vir sulke onderwysers is onderwys meer as net ’n manier om kos op die tafel te sit; dit is hul passie; hul roeping en hul bydrae om die wêreld elke dag ’n beter plek te maak.
Onderwysers het die vermoë om ’n kind se lewe onherroeplik te verander en hulle besef dit dalk nie aldag nie, omdat daar oor die jare so baie leerders deur hul hande gaan. Maar die positiewe impak wat hulle op ’n kind se lewe en toekoms maak, moenie onderskat word nie.
Hier op die Kuier- kantoor is daar spanlede wat hul onderwysers ewig dankbaar sal wees omdat hulle hul selfvertroue ’n hupstoot gegee het; hulle geïnspireer het om hul drome te volg en om net oor die algemeen beter mense te wees.
Elke dag gee en gee onderwysers net van hulself en nou span Kuier en kykNET saam om merkwaardige onderwysers die openbare en nasionale erkenning te gee wat hulle verdien! As jy só ’n onderwyser ken, móét jy hulle vir Kuier en kykNET se My Beste Onnie-kompetisie inskryf.
Kuier gaan tien onderwysers kies wat elkeen R2 000 gaan wen! Dit is jou kans om vir hulle dankie te sê vir die verskil wat hulle in jou lewe gemaak het.