WAAR IS DIE WERK?
Duisende Suid-Afrikaners verloor tans hul werk en almal is desperaat om vir hul families te sorg. Maar kenners waarsku dit gaan erger word voor dit beter gaan . . . DEUR tarren-lee habelgaarn
Die Covid-19-pandemie is besig om op groot skaal verwoesting te saai onder Suid-Afrikaanse werkers. Werkloosheid is al jare lank ’n erge probleem in Suid-Afrika, maar as jy gedink het dit was moeilik om in 2019 ’n werk te kry en kos op die tafel te sit, het die pandemie dit nou nóg moeiliker gemaak.
Kenners meen ook dinge gaan eers vererger voor dit gaan beter word en dat dit byna onmoontlik gaan wees om oor die volgende ses tot nege maande in sekere sektore werk te kry.
Mail&Guardian het in Junie berig in die vorige finansiële jaar (2018-2019) het 38 588 mense hul werk verloor (ingevolge artikel 189a) en volgens die kommissie vir versoening, bemiddeling en arbitrasie het 98 818 werkers vanjaar tussen 1 April en 25 Junie 189a-kennisgewings ontvang.
Vroeër vanjaar het Suid-Afrika se grootste klerehandelaar, Edcon, met hul afleggingsproses begin en ten minste 22 000 werkers se poste word geraak.
Die sukkelende gedrukte mediabedryf is erg geruk met ’n hele paar tydskrifte wat sedert lockdown gesluit is of geherstruktureer gaan word. Tien tydskrifte is deur Caxton & CTP Publishers & Printers Limited toegemaak, waaronder Bona, Rooi Rose en
Vrouekeur. Tydskrifte soos Cosmopolitan en Good Housekeeping is sedert lockdown gesluit deur The Associated Press. Media24, die grootste mediamaatskappy in Afrika wat Kuier uitgee, het in Julie ook sluitings en herstrukturerings aangekondig met 1 100 poste wat geraak word. en mense wat nuwe besighede begin het.
Emmerentia Simons (45) van Johannesburg sê sy was die enigste een in haar huishouding wat ’n salaris verdien het. Sy is ’n enkelouer en omdat sy in toerisme werk, is haar bekommernis nóg groter, want dit is nog te vroeg om te bepaal wanneer landsgrense weer vir die toeriste sal oopmaak. En selfs al word die reëls vir plaaslike toerisme verslap, glo Emmerentia mense is nog te bang om hul huise onnodig te verlaat. Nou weet sy nie hoe sy vir die res van die jaar vir haar twee kinders gaan sorg nie.
Sy is byna in trane wanneer sy vertel dat die klein toerismemaatskappy waar sy al meer as 15 jaar gewerk het, in Mei hul deure moes sluit.“Ongelukkig, omdat ons so klein is, is daar nie baie kontantvloei nie en ons het meestal op kommissie gewerk, so jy moes altyd seker maak jy kry genoeg kliënte. Ek het nie ’n formele kwalifikasie nie en ek was gelukkig dat my (voormalige) baas ’n kans met my gevat het. Ek was desperaat vir werk en het van mense gehou en kan mense goed oortuig om iets te koop. Ek weet nie hoe ek weer ’n werk gaan kry nie. Nou is ek ouer en dit is moeilik om teen jonger gekwalifiseerde mense te kompeteer,”sê Emmerentia.