KUIER GEE OM
Ons weet hoe groot die nood is in ons gemeenskappe, daarom het ons ingespring en ’n plan gemaak om ons mense te probeer help tydens die Covid-19-pandemie. DEUR Kuier-Verslagspan
Die hartverskeurende gevolge van Covid-19 kan reeds baie duidelik in ons gemeenskappe gesien word. Só ly baie Suid-Afrikaners reeds honger en ander is baie bekommerd dat hulle dalk hul werk gaan kwyt wees weens die ekonomiese pak wat die virus die land gee.
Die skrif is dus reeds aan die muur en ons mense kry swaar. Dit is egter belangrik dat almal van ons besef die virus kan net geklop word as ons sáám daarteen baklei. Dieselfde is ook waar vir die erge sosiaalmaatskaplike gevolge wat so baie tref.
Ons weet almal het nie miljoene om by te dra tot hulpfondse nie en almal draai nou hul sente om, maar as elkeen van ons iets doen om ons naaste te help, sal dit ’n verskil maak. Jy hoef ook nie ver te soek na mense om te help nie, want dit lê voor elkeen se voordeur en wag. So as almal net een klein iets vir ons naaste doen, dalk met ’n kospakkie of ander skenking, sal ons almal anderkant uitkom.
Vir die Kuier- span is dit baie belangrik dat ons ook ons deel doen om minderbevoorregtes te help en daarom het ons die KuierCares-projek begin om veral in die pandemie na ons naaste uit te reik en ons het eerste by ons eie werkfamilie begin.
Met die sny van koerante en tydskrifte se drukoplae is baie informele koerant- en tydskrifverkopers se inkomste oornag drasties gesny.
Voroshski Jansen, sirkulasiebestuurder Media24 Afrikaanse Nuus, vertel hy het daagliks oproepe van bekommerde verkopers gekry wat nie geweet het waar die volgende maaltyd vir hulle en hul gesinne vandaan gaan kom nie.
Voroshski het met Kay Karriem gesels en hulle het ’n plan beraam om die verkopers te help met kospakkies. Vanaf 6 Junie het ons toe begin om 50 kospakkies te versprei – van Scottsville, Scottsdene, Walacedene, Eersterivier, Macassar, Bellville-Suid, Northpine en Paarl in die Kaap tot in Bridgeton, Oudtshoorn. Dit was hartroerend om te sien hoe mense daardie klein pakkies terdeë waardeer.
Ons het dadelik besluit om ’n tweede ronde kospakkies te doen.“Ek is so dankbaar dat ons met hierdie klein gebaar mense in nood kon help. Alle eer gaan natuurlik aan ons Hemselse Vader wat ons in die bevooregte posisie geplaas het en
ook die gawe van mededeelsaamheid aan ons geskenk het,”sê Voroshski.
Nadat die eerste pakkies versprei is, het ons besef hoe groot die nood is en besluit om ook ’n gemeenskapsorganisasie te ondersteun wat dan baie meer mense kan help. Dit was nie maklik om ’n begunstigde te kies nie, maar Quinton Adams van die Shackbuilder-organisasie in Kaapstad oor wie Kuier reeds berig het, het uitgestaan in sy pogings om die enorme nood in die gemeenskap weens Covid te probeer verlig.
“Met die aanvang van die inperkingstaat het ons besef ons sal ons voedsel-voorsiening eenvoudig moet verbreed en verhoog. Ná 100 dae van inperking voorsien ons weekliks produkte en bestanddele aan meer as 60 voedselskemas as deel van die Shackbuilder’s Food Relief Programme.
“Ons het die naaktheid en wreedheid van honger gesiggies gesien wat wag in die strate vir kos. Dit was ’n hulpkreet wat ek nooit sal vergeet nie,”sê Quinton.
“Met verloop van tyd het die rye by die voedselskemas net langer en langer geword. En dan wanneer dit die kinders se beurt is om daardie plastiekbakkie te gee vir die kos-antie, gebeur daar iets fassinerend. Die kos word geskep en die reuk van ’n warm bord kos begin om die die strak gesiggie te verander in ’n glimlag. Daar is ‘n sigbare transformasie daardie moment – dit is‘n magiese moment, onbeskryflik wat gebeur in die psige van daardie kind. Die transformasie wat plaasvind tydens die skep van die kos, is een groot psigologiese en terapeutiese oomblik – wanhoop het oombliklik in hoop verander. Dit is ’n aangrypende oomblik wat net by ’n voedselskema kan gebeur,”vertel hy.
Ons wou Quinton help, maar het nie self die geld of produkte gehad om te skenk nie. Toe het ons by ons vriende by Spar om hulp gaan aanklop en hulle het vir Quinton kos ter waarde van meer as
R30 000 geskenk!
“Vir my is Kuier ’n ‘hartstydskrif’ wat identifiseer met die pyn en lyding, sukses en prestasie van mense, en wat daardeur ’n hoop-agent is vir die wense en drome van vele ander mense. Met hierdie Kuier/ Spar-donasie is dit net ’n verdere demonstrasie van die‘hartklop’van die redaksie om saam ’n verskil te maak deur ’n praktiese handeling van diepe omgee,”sê Quinton.
Kuier wou graag saam met Quinton die produkte gaan uitdeel by een van die 60 sopkombuise wat sy projek ondersteun, maar hy was ongelukkig in self-isolasie weens Covid-19. Hy het sedertdien ’n negatiewe toetsuitslag ontvang en is gelukkig weer op sy pos.
Ons kon natuurlik nie die wyse gryses van ons gemeenskap vergeet as deel van hierdie uitreikprojek nie, daarom het ons vandeesmaand ook bederfpakkies by twee outehuise, La Provence Retirement Village in die Kaap en Sen CIT Restheaven Home for the Aged in die Strand, uitgedeel.
Kuier gee werklik om.