Twee keer in rehab
sel jou senuwees aanval. Iemand wat ons ken het dieselfde siekte gehad, so ons het min of meer geweet wat wag.”
Hy was vir twee weke in die intensiewe sorgeenheid (ICU) by Panorama-hospitaal waartydens sy liggaam só erg verswak het dat hy niks meer vir homself kon doen nie, en is daarna na die Vincent Pallotti-rehabilitasiesentrum in Pinelands oorgeplaas.
“Ons het gebid dat ’n ventilator nie nodig sou wees nie en God het ons gebede beantwoord. Dit is weereens ’n bewys gebed dra krag en dit maak nie saak in watter situasie jy beland nie, God is met jou. Daar was so baie vriende wat gekuier het dat elkeen letterlik net twee minute kon inloer om almal kans te gee,”sê hy.
Toe hy hoor dat hy vir drie maande by die rehabilitasiesentrum moes bly, het hy hewig teen die karre geskop.
“Ek bedoel drie maande is lank. Ek moes dit toe so aanvaar, want ek kon niks vir myself doen nie. Ek moes van oor af leer om als te doen.
“Dit raak aan ’n mens se menswaardigheid wanneer jy toilet toe moet gaan en iemand moet jou skoonmaak. Ek haal my hoed af vir die caregivers wat dit met ’n goeie hart en gesindheid doen. Ek onthou ek moes my tandeborsel in my hand hou en my kop beweeg sodat ek tande kon borsel. In hierdie tydperk het Debbie 50 geword en moes haar dag by my in die hospitaal deurbring. As oefening vir my hande het ek vir haar ’n verjaardagkaartjie gemaak. Sy sê dit is haar mees spesiale verjaardagkaartjie ooit.”
Leigh meen wanneer jy trou, is dit in “sickness and in health”en wanneer so iets gebeur, toets dit jou beloftes. Sover het hulle nog die toets geslaag.
Die moeilikste vir hom deur al die terapie was die verlange om te loop. Hy het die rehabilitasiesentrum in ’n rolstoel verlaat, maar hy wou loop en hy het dit ses maande later gedoen.
Maar toe tref die noodlot hulle sowaar weer ’n jaar later . . .
Hy en Debbie het op 19 Desember 2017 ’n familietroue in die Oos-Kaap bygewoon en twee dae later was hulle in ’n motorongeluk betrokke. ’n Verbygaande voertuig se trailer het losgekom en met hul voertuig gebots. Sy vrou het ’n paar skrape gehad. Leigh het egter ’n traumatiese breinbesering opgedoen, iets waarvoor daar geen waarborg op herstel is nie. En wéér was hy verlam en wéér moes hy na ’n rehabilitasiesentrum gaan.
“Ek het twee weke in die hospitaal deurgebring. Ek moes weereens na ’n rehabsentrum gaan.”En weereens het Debbie die stukkies saam met hom opgetel.