HALLO MY KUIER MENSE,
Die meeste van ons het iewiewers in die afgelope twee jaar weens die pandemie en gevolglike inperkings ’n bietjie gestruikel. Daar kom tye dat selfs die positiefste mense moedverloor se vlakte moet gaan besoek. Dis in daardie donker tye wanneer die omstandighede buite ons beheer is dat ons soms moed elders moet gaan skep.
As dít is waar jy jou vandag bevind, is hierdie uitgawe net wat jy nodig het om weer ’n bietjie die gemoed te lig. Dit is vol aangrypende stories van mense wat deur die donker van hul omstandighede gedruk het om uiteindelik by die lig uit te kom. Ons geestelike boodskap gee die toon aan deur ons daaraan te herinner dat wonderwerke ’n werklikheid is, maar nie altyd kom in die vorm of op die tyd wat ons dit soek nie. Lees net Cecilia Jacquire se storie (bladsy 10) as jy dit nie glo nie, want dis beslis danksy geloof dat sy kanker en Covid-19 geklop het!
Sania Sonnekus se aangrypende storie (bladsy 14) gaan Kuier- ma’s beslis aan hul harte ruk, want net ’n ma sal die hartverskeurende keuse verstaan waarmee sy gekonfronteer is. Ons bid saam met haar en haar gesin dat ons in Augustus blye nuus met julle kan deel. Jong mense wat ’n verskil in hul gemeenskappe wil maak, is altyd baie inspirerend en ons nuwe Mej. SA is beslis een van hulle. Dit lyk nie of haar jaar met die kroon maklik gaan wees nie, maar Lalela is vasbeslote om die geleentheid aan te gryp.
Die storie oor slapeloosheid het my letterlik laat regop sit. Ek sukkel al ’n groot deel van my lewe met insomnia, maar dis vir my duidelik dat ek slegter slaap sedert Covid-19 ons getref het. Lees beslis dié storie as jy ook sukkel om deesdae te slaap.
Tot volgende keer,