BLAARSLAAIWRAPS MET SNOEK EN MANGO-EN-KIWI-SALSA

Genoeg vir 4

BESTANDDELE

Snoek

800 g vars of bevrore snoek (ontdooi indien bevrore), oopgevlek

Sout en gemaalde swartpeper

6 eetlepels botter

3 mollige knoffeltoontjies, gekneus en fyngekap

1 rooi brandrissie, pitjies en naatjies verwyder en fyngekap

½ koppie fyn appelkooskonfyt

¼ koppie hoenderaftreksel

Sap van 1 suurlemoen

Mango-en-kiwi-salsa

1 mango, geskil en van die pit af in blokkies gesny 1 kiwi, geskil en in blokkies gesny

1 klein rooiui, fyngekap

2 eetlepels vars koljander, fyngekap 2 eetlepels vars lemmetjiesap

Sout en gemaalde swartpeper na smaak Samestelling

2 koppe botterblaarslaai (butterhead lettuce) 3 radyse (radishes), in skyfies gesny 1 avokado, geskil en in skyfies gesny

METODE

Snoek: Sit die snoek met sy velkant na onder op die rooster van ’n oondroosterpan. Geur met sout en peper. Smelt die botter in ’n potjie en voeg die knoffel, brandrissie, appelkooskonfyt, aftreksel en suurlemoensap by. Bring tot kookpunt. Verlaag die hitte en laat dit vir 5 minute prut. Verf die mengsel rojaal oor die snoek. Sit dit in ’n voorverhitte oond van 180 °C vir 20 – 25 minute. Bedruip gereeld met die bottermengsel. Sodra die snoek afgekoel het, verwyder die vel en grate en vlok dit. Terwyl die snoek in die oond braai, kan jy die salsa maak.

Salsa: Meng al die bestanddele in ’n kleinerige glasbakkie en hou eenkant. Samestelling: Maak die blare los van die blaarslaaikoppe en pak dit op ’n mooi opdienbord. Skep ’n hopie snoek op elke blaar, garneer dit met ’n skeppie salsa en pak die radys- en avokadoskywe bo-op.