DIE RECOVERING OPBOTTELENDE ONTPLOFFER
Sy het agtergekom dat die manier hoe sy nog altyd gestry het, haar nie meer dien nie, sê die joernalistiekdosent Abigail Isaacs (44) van Milnerton in die Kaap. Sy bottel haar gevoelens op tot dit onuithoudbaar word en dan laat waai sy.“Dis dan asof ’n bom ontplof het, en my wederhelf weet glad nie waar die gevoelens vandaan kom nie.”Hoekom doen sy dit?“Ek hou glad nie van konfrontasie nie, want daar was nooit oop konfrontasie in my ouerhuis nie. Natuurlik het my ouers dan en wan gestry, maar dit was die uitsondering. Daar was meestal hierdie passive-aggressive vibes wanneer hulle nie lekker was met mekaar nie. En dis wat ek geken het en toe ook in my verhoudings ingeneem het.”
Haar manier van stry is nie juis die ideale konflikhantering nie.“Dis hoekom ek sê dat ek nog in recovery is. My man hou ook maar baie dinge opgebottel, maar vergeleke met my, is hy meer in touch met sy gevoelens, en hy roer dan die onderwerp aan nog lank voor sy emosies breekpunt bereik.”Aanvanklik, meen Abigail, het beide se manier van konflikhantering, nogal skade aan hul verhouding berokken. En, nou, ná meer as veertien jaar saam begin die twee stadig, maar seker mekaar beter leer ken. Hulle het ook uiteindelik besef dat die manier hoe dinge in die verlede hanteer is, eintlik meer skade gedoen het.“Ons probeer om beter met mekaar om te gaan, maar dis nie altyd maklik nie. Want ’n mens keer so vinnig terug na default veral as jy moeg, oorwerk of bloot net lui is om die nodige werk te doen.”
Hoe voel haar maat wanneer sy uit die bloute ontplof?“Natuurlik is hy dan sommer op sy agterpote, want ek is die een wat op die aanval is. Maar ek voel soms baie verlig omdat ek uiteindelik daardie opgebottelde emosies kon uitlaat. Maar die verligting is van korte duur, want dan bevind ek my in ’n emosionele warzone. Ons albei is goed om die foute van die ander een uit te wys, maar baie sleg om ons eie fout te eien. Ek het ook nie in my ouerhuis enigiemand sien of hoor verskoning vra nie en moes dit as ’n volwassene aanleer, wat op sigself ’n pynlike ervaring is. Ek en my man is darem nou ’n bietjie beter as voorheen met die konflikhantering, maar daar is nog baie ruimte vir verbetering.”