DEKADENTE TIRAMISU-SJOKOLADEKOEK
Lewer 1 middelslagkoek
BESTANDDELE
Koek
1 koppie suiker
’ n Knippie sout
1 koppie koekmeel
¼ koppie karringmelk
½ teelepel koeksoda (bicarbonate of soda)
½ teelepel vanilla essence
1 eier teen kamertemperatuur
110 g sagte botter
2 eetlepels kakao
½ koppie water
1 koppie espresso of baie sterk koffie, afgekoel
Vlamengsel
2 eiergele
4 eetlepels strooisuiker (castor sugar)
1 x 225 g-houer mascarponekaas teen kamertemperatuur
1 eetlepel brandewyn
1 koppie room, styfgeklits
Kakao vir versiering
METODE
Koek: Voorverhit die oond tot 180 °C. Smeer 2 ronde koekpanne goed met botter of spuit dit met baksproei. Meng die suiker, sout en koekmeel saam in ’n mengbak. Meng die karringmelk, koeksoda, vanilla essence en eier saam in ’n kleiner bakkie. Smelt die botter in ’n potjie. Voeg die kakao by en klits dit goed met ’n draadklitser. Voeg die water by en roer tot glad. Bring die kakaomengsel tot kookpunt ek kook vir 10 sekondes voordat jy dit van die hitte verwyder. Roer die kakaomengsel by die meel om effens af te koel en roer dan die eiermengsel daarby. Verdeel die beslag tussen die gesmeerde panne en bak vir ± 30 minute of tot gestol en ’n tandestokkie skoon uitkom. Laat koel die koeke effens in die plaat af voor jy dit uitkeer. Sny elke koek horisontaal in die helfte sodat jy 4 lae het. Sit die 4 lae langs mekaar op bakpapier. Verf elke laag met ’n bietjie van die afgekoelde koffie.
Vlamengsel: Sit ’n hittebestande bak oor ’n pot met warm water. Die water moet warm wees, maar nie kook nie. Voeg die eiergele en 2 eetlepels strooisuiker in die bak. Klits dit met ’n draadklitser tot die suiker opgelos en die eiers lig en gaar is. Haal die bak van die hitte af en laat dit effens afkoel. Voeg die mascarpone en brandewyn by en klits tot glad. Klits die room en die ander 2 eetlepels strooisuiker tot sagte punte begin vorm in ’n skoon bak. Vou die room met ’n groot lepel by die roomkaas-mengsel in. Samestelling: Sodra die koeke heeltemal afgekoel is, kan jy dit begin versier. Verdeel die vlamengsel tussen die 4 koeklae. Stapel die lae op mekaar en sif ekstra kakao daaroor. Verkoel in die yskas tot net voor opdiening.