LESERSWENKE
As jy verf of ’n baie taai stof op jou hande het, skrop hulle met ’n mengsel van olie en suiker. Dit sal dadelik afkom.
MAGDA, SASOLBURG
Hoe om ’n puffer jacket se vorm terug te kry ná ’n was: Sit net die puffer jacket in die tuimeldroër saam met so drie tennisballe en een of twee handdoeke vir so vier minute. Die baadjie kom perfek uit – weer pofferig en nie plat nie.
MICHELLE LOUW, WATERKLOOF RIDGE
Om jou hond stil te hou terwyl jy hom of haar was, sit ’n bak met hondeversnaperings of hondekos teen die muur vas. Terwyl jou hond eet, was jy gou-gou die moeilike plekke.
JAYTEE MARCH, GOODWOOD
Met beurtkrag byna elke dag, sit tweeliterbottels water in jou vrieskas – dit hou jou vleis gevries vir langer.
CHARLENE DAVIDS, BREDASDORP
Om koffie en tee uit jou klere uit te haal, gebruik jy ’n blik van Mr. Sheen multi-surface daily cleaner. Skud goed en spuit dit op die koffie- of teekol. Dit verwyder dit dadelik. Was dit met waspoeier uit.
ELIZABETH CORDIER, KROONSTAD
Verwyder die reuk van tabak en rook uit ’n vertrek deur lemoen- of suurlemoenskil in die vertrek te brand.
GHERSWIN,GHERSWIN EERSTERIEERSTERIVIER
Moet jy ’n kilogram of twee verloor sodat die winterklere pas? Eet met chopsticks. Jy sal minder en stadiger eet omdat dit meer moeite is.
CORNELI WESSELS, POTCHEFSTROOM
As jy baie skuim in die wasbak het ná jy skottelgoed gewas het, smeer jou wasvadoek met Sunlight-seep en spoel dit in die skuimwater. Dit laat al die skuim verdwyn en jy bespaar terselfdertyd water, want jy het nie nodig om die water te laat loop om van die skuim ontslae te raak nie.
JULIE ROOS, ALBERTON
Knip jou blomme 1 cm af onder lopende water en verwyder alle blare wat in die vaas gaan. Voeg een teelepel bleach en suiker by jou blomme se water en dit sal vir drie weke lank vars en kleurvol in jou huis bly.
LIZANDRIA ADAMS, EERSTERIVIER
As jy klitsgras of kakiebos afsny of uittrek, trek ’n ou reënjas aan – die klitse klou dan nie!
JESSIE WOLTERS, RANDFONTEIN
Dis nou brei-tyd. Hou twee gewone kurkproppe in jou breisak en elke keer voor jy jou breiwerk bêre, druk jou breinaalde se punte in die proppe. Sodoende is jy verseker jou breiwerk skuif nie van die naalde af en jy verloor steke nie.
ANNE, HENNENMAN