DIT REËN KOEËLS...
Massaskietvoorvalle is nie iets waarmee jy sommer Suid-Afrika vereenselwig nie. Dit voel meer soos iets wat in lande soos Amerika of elders in die wêreld gebeur. Maar die onlangse skietvoorval by die New Somerset-hospitaal in Kaapstad waarin drie mans gesterf het, sowel as statistieke wys dat hierdie tipe misdade wel op ons strate en selfs nou in ons hospitale plaasvind.
Tussen Junie 2019 en Desember verlede jaar was daar meer as 400 gevalle van massaskietery in die Wes-Kaap. Altesaam 600 mense is doodgeskiet en meer as ’n 1 000 is gewond. Hierdie skokkende stand van sake is onlangs onthul toe Reagen Allen, die Wes-Kaapse LUR vir gemeenskapsveiligheid en polisietoesig, meer oor massaskietvoorvalle wou weet.
Die Suid-Afrikaanse Polisiediens (SAPD) definieer ’n massaskietery as ’n voorval waarin drie of meer mense geskiet word. Die polisie ondersoek sedert Maart vanjaar minstens drie sulke voorvalle in Khayelitsha.
In ’n land soos Suid-Afrika waar misdaad hoogty vier, is skietvoorvalle teen hierdie tyd niks vreemds nie, maar wanneer jy die statistieke oor massaskietvoorvalle sien, kan jy nie anders as om geskok te wees dat hierdie voorvalle binne net twee jaar op eie bodem plaasgevind het nie.
Toe die nuus op 7 Mei 2022 breek van ’n skietvoorval op die tweede verdieping by die New Somerset-hospitaal in Groenpunt, Kaapstad, is aanvanklik bespiegel dat dit bendeverwant kan wees. Mense, wie se familielede by die hospitaal was vir mediese versorging, het vervaard begin rondbel opsoek na hul mense. Daar was groot onsekerheid oor presies wat daardie oggend by die hospitaal gebeur het.
En toe kom die skokkende polisieverklaring dat twee pasiënte doodgeskiet is. ’n Derde slagoffer, ’n polisieman, is ook ernstig gewond en het die volgende oggend gesterf. Hy was konstabel Donay Phillips (32) wat by Seepunt-polisiestasie gestasioneer was. Die ander twee slagoffers se identiteit is ook intussen bekendgemaak – Geret Carolus (48), wat vir die afgelope 11 maande op Atlantis woonagtig was, en Lionel Eckleton (42), ’n hawelose man.
beskuldigde
Jean-Paul Malgas (39), ’n voormalige polisieman van Hopefield aan die Weskus, is in verband met die voorval in hegtenis geneem.
Volgens Netwerk24 is Jean-Paul op
6 Mei deur ’n polisiebeampte na die hospitaal begelei nadat hy die vorige dag deur ’n ander polisiebeampte in Hopefield gewond is nadat hy glo ’n beampte in die