SUURLEMOEN-EN-LEMMETJIEKOEK
Lewer 1 koek
BESTANDDELE
Koek
390 g koekmeel
20 ml bakpoeier
2,5 ml sout
300 g strooisuiker
(castor sugar)
5 eiers, geskei
180 ml sonneblomolie
15 ml fyngerasperde skil van suurlemoen en lemmetjie
200 ml water
75 ml lemmetjiesap
Buttercream
400 g versiersuiker
(icing sugar), gesif
200 g botter (kamertemperatuur) 50 ml suurlemoensap Fyngerasperde skil van 2 lemmetjies
Meringue
120 ml witsuiker
1 ml sout
60 ml water
2 eierwitte
Suurlemoen-curd
3 eiers
3 eiergele
200 g strooisuiker Fyngerasperde skil van 1 suurlemoen
180 ml suurlemoensap
200 ml mielieblom gemeng met 30 ml water (opsioneel)
160 g botter, in blokkies gesny
METODE
Koek: Voorverhit die oond tot 170 °C. Smeer en voer drie koekpanne (20 cm) met bakpapier. Sif die meel, bakpoeier, sout en 200 g van die strooisuiker. Meng die eiergele, olie, suurlemoen- en lemmetjieskil, water en lemmetjiesap. Klits die eierwitte tot sagte punte vorm en voeg die res (100 g) van die strooisuiker by. Klits vir 2 minute. Voeg die eiergeelmengsel by die droë bestanddele en meng totdat dit ’n beslag vorm. Vou die eierwitte versigtig by die beslag in. Giet die beslag in die panne en bak vir 22 minute. Laat dit heeltemal afkoel en haal dit uit die panne.
Buttercream: Klits die helfte van die suiker saam met die botter. Voeg die sap en die res van die suiker om die beurt by. Voeg die skil by. Klits goed tot lig en donsig.
Meringue: Los die suiker en sout op in die water wat in ’n kastrol oor medium hitte is. Laat die stroop kookpunt bereik sodra die suiker opgelos het. Begin die eierwitte in ’n glasbak klits wanneer die suiker 112 °C bereik. Dit moet stywe punte het. Haal die stroop van die stoof af as dit 118 °C is en voeg dit stadig by die eierwitte. Hou aan klits. Die hele proses moet so 3 minute vat. Klits die meringue totdat dit begin afkoel. Dit moet steeds warm wees wanneer jy dit gebruik.
Curd: Klits die eiers, eiergele, suiker, skil en sap in ’n kastrol. Roer die mielieblompasta by. Sit die kastrol op lae hitte. Voeg die helfte van die botter by en klits tot die curd dik word en kookpunt bereik. Haal dit van die stoof af en voeg die res van die botter by. Klits dit liggies tot die botter smelt. Giet die curd in ’n glasbak en bedek dit met kleefpastiek. Laat dit kamertemperatuur bereik en sit dit oornag in die yskas.
Samestelling: Maak die koeklae gelyk en smeer buttercream en curd op. Pak die lae op mekaar en sit die koek in die yskas om ferm te word. Smeer buttercream om die koek en skraap die meeste af sodat jy weer die koek kan sien. Smeer buttercream bo-op die koek en versier dit met die meringue. Skroei die meringue liggies. Bedruip die koek met die suurlemoen-curd. Rond dit af met klein meringues of lemmetjies.