OMBRÉ PIÑATA-KOEK
Lewer 1 groot koek
BESTANDDELE
Koek
1½ hoeveelhede koekmengsel (resep volg) 380 g koekmeel
300 g witsuiker
7,5 ml koeksoda (bicarbonate of soda) 2,5 ml sout
3 eiers
300 ml sonneblomolie
15 ml vanilla essence
375 ml amasi of karringmelk
30 ml asyn of suurlemoensap Voedselkleursel van jou keuse
Buttercream
500 g botter
1 pakkie versiersuiker (icing sugar)
60 ml kookwater
Geursel van jou keuse
Samestelling
Buttercream
Lekkers of klein geskenkies
1,5 kg wit fondant Versiersuiker Fondant-blomme
METODE
Koek: Voorverhit die oond tot 180 °C. Smeer en voer vyf koekpanne (20 cm) met bakpapier. Sif die meel, suiker, koeksoda en sout saam. Meng die eiers, olie, vanilla essence, amasi en asyn in ’n ander bak. Voeg die nat bestanddele by die droë bestanddele en meng goed. Verdeel die mengsel in vyf ewe groot porsies en gebruik voedselkleursel om vyf skakerings te maak. Begin byvoorbeeld met ’n baie ligte pienk en maak dit al hoe donkerder. Skep die beslag in die koekpanne en bak vir 20 minute tot deurgaar en ’n tandestokkie skoon uitkom as dit in die middel gedruk word. Laat dit heeltemal afkoel op draadrakkies.
Buttercream: Klits die botter tot lig en donsig. Voeg die suiker geleidelik by en klits goed. Voeg die kookwater bietjie vir bietjie by as die icing te dik raak. Klits dit goed vir omtrent 10 minute totdat dit lig en donsig is. Klits geursel van jou keuse by. Samestelling: Sny die lae sodat dit dieselfde hoogte is. Sny 10 cm uit die middel van die onderste vier lae. Gebruik
’n bietjie buttercream om die koek aan die koekbord vas te maak. Begin met die donkerste laag. Sit die res van die lae bo-op mekaar met buttercream tussenin. Maak die gat vol met die lekkers of geskenkies en sit die boonste laag op. Bedek die koek rondom en bo-op met buttercream en maak dit gelyk. Sit die koek in die yskas vir 15 minute. Smeer nog ’n laag buttercream oor wanneer die koek yskoud is. Sit dit in die yskas totdat die buttercream hard is. Verf die buttercream liggies met water voordat jy die fondant oor die koek sit. Rol die fondant op ’n versiersuikerbestrooide oppervlak. Lig die fondant met ’n koekroller en sit dit oor die koek. Laat dit oornag hard word of verkieslik vir 24 uur. Versier die koek met fondant-blomme.