DEKADENTE SJOKOLADE-EN-KERSIE-KOEK

Lewer 1 koek

BESTANDDELE

Koek

160 g donkersjokolade, gekap 80 g kakaopoeier, plus ekstra 250 ml warm, sterk koffie

275 g koekmeel

5 ml koeksoda (bicarbonate of soda)

10 ml bakpoeier

2,5 ml sout

325 g botter

100 g strooisuiker

(castor sugar)

200 g donkerbruinsuiker

6 eiers

170 g ongegeurde jogurt

Kersie-compote

2 x 425 g-blikkies kersies, gedreineer, ontpit en effens gekap (hou 100 ml van die vloeistof)

100 g strooisuiker

Fyngerasperde skil van ½ suurlemoen

1 ml amandel-essence

45 ml kersielikeur (opsioneel)

Room

750 ml kloproom

60 g versiersuiker (icing sugar)

Samestelling

100 g sjokolade vir tussen die lae, gerasper Sjokoladeskerwe

Vars kersies Maraschino-kersies (bedek met goue blare, opsioneel) Kakaopoeier

METODE

Koek: Voorverhit die oond tot 180 °C en smeer twee koekpanne (20 cm). Sif kakaopoeier liggies in die pan. Meng die sjokolade en kakaopoeier in ’n bak en gooi dit oor die koffie. Roer om dit te meng en die sjokolade te smelt. Sif die meel, koeksoda, bakpoeier en sout saam in ’n ander bak. Hou eenkant. Klits die botter en al die suiker tot lig en romerig. Voeg die eiers een op ’n slag by. Klits goed ná elke byvoeging. Voeg die sjokolademengsel by die eiers. Voeg die droë bestanddele en jogurt by. Meng goed tot ’n gladde beslag. Verdeel die beslag tussen die panne en bak dit vir 25 – 30 minute. Laat dit heeltemal afkoel. Kersie-compote: Meng al die bestanddele in ’n klein kastrol oor lae hitte, en roer dit om die suiker op te los. Prut vir 5 minute en skep 45 ml van die vloeistof uit. Meng dit met die likeur. Hou eenkant. Prut verder tot die compote begin verdik. Laat dit heeltemal afkoel. Room: Sit jou bak en klitsers in die yskas totdat dit baie koud is. Klits die room en versiersuiker tot stywe punte vorm. Samestelling: Sny elke koek in die helfte (horisontaal) deur en verf dit met die likeurstroop. Pak die lae op mekaar nadat jy tussen elkeen compote, room en gerasperde sjokolade gesit het. Bedek die koek met ’n laag room of sjokolade-ganache. Sit dit in die yskas totdat dit yskoud is. Versier die koek met die sjokoladeskerwe, kersies en sif kakaopoeier liggies oor.