Borgtog van moordverdagtes eers in 2018
Justice Mooi en Cabiso Klip, die twee verdagtes wat in verband met Preston Titus se moord in hegtenis geneem is, het Maandag in die landdroshof vir ‘n borgtogaansoek verskyn.
Landdros Roelf Konstabel het Klip se saak tot 10 Januarie 2018 vir ‘n formele borgtogaansoek uitgestel.
Mooi se saak was tot Dinsdag vir ‘n borgtogprofiel uitgestel waarna dit ook tot 10 Januarie vir ‘n formele borgtogaansoek uitgestel is.
Soos verlede week, het die verrigtinge weer onder hewige polisiebewaking plaasgevind. Die polisie het toegang tot die hof beheer en slegs 40 persone is toegelaat.
Konstabel het na Klip se eerste verskyning gevra dat toegangsbeheer toegepas word omdat die groep wat die verrigtinge wou bywoon te groot was en die verrigtinge ontwrig het.
Adv. Benito Metembo wat vir Klip verskyn het in die voorlopige borgtogaansoek, het Maandag gesê dat die staat hulle dokumente en vordering in die ondersoek gedeel het.
“Dit is weens inligting wat uit die dokumente kom dat ons versoek dat die saak tot Januarie uitgestel word. Dit is in belang van geregtigheid dat die polisie sekere kwessies, wat ons nie nou in die hof gaan noem nie, eers deeglik moet ondersoek,” het Metembo gesê.
Adv. Goodman Jaxa, die hoofaanklaer wat die saak vir die staat behartig, het bevestig dat daar met die beskuldigdes sowel as die verdediging ooreengekom is om die saak tot volgende jaar uit te stel.
Kapt. Malcolm Pojie, die Suid-Kaapse polisiewoordvoerder, het hierdie week bevestig dat moontlike bewysstukke deur die Oudtshoorn-speurders gevind is.
Pojie wou nie bevestig of die gerugte dat dit moontlik moordwapens is wat gevind is, waar is nie.
“Ons kan op hierdie stadium net bevestig dat bewysstukke gevind is en vir forensiese ontleding weggestuur is.”
Titus se liggaam is op 2 Desember in die vroeë oggendure in sy huis by die weermagbasis gevind. Daar was verskeie steekwonde aan sy liggaam.