PA: Boorgate droog op
Prins Albert beleef sy ergste droogte in 100 jaar. Anneleen Vorster, korporatiewe- en gemeenskapsdiens bestuurder by die Prins Albert-munisipaliteit, het Maandag bevestig dat uiters streng waterbeperkings ingestel is.
Dié Karoo-dorp, wat van boorgatwater en ‘n paar uur se weeklikse leiwater afhanklik is, se munisipaliteit veg nou om te verhoed dat boorgate opdroog. Waterbeperkings wat sedert Woensdag 3 Januarie van krag is, bepaal onder andere dat die ongeveer
9 000 inwoners slegs 90 liter water per dag per persoon mag gebruik. Die gebruik van tuinslange, was van motors en vul van swembaddens met munisipale water is verbied. Wetstoepassers hou ‘n wakende oog oor die gebruik van water.
“Ons as munisipaliteit het ‘n omvattende bewusmaking s veldtog van stapel gestuur om te verhoed dat ons boorgate leegloop,” het Vorster gesê.”
Die nege boorgate lewer gesamentlik 41 000 liter water per uur. Ten opsigte van hoe die leiwater deur die Kweekvallei-waterraad bestuur word, verduidelik Vorster, “Ons kry weekliks 18 uur volstroom en twee ure halfstroom leiwaterbeurte. ‘n Volstroom leiwaterbeurt lewer 100 000 liter per uur. Leiwaterbeurte is in die titelaktes van sommige erwe in Suid-End, Prins Albert, ingeskryf wat die betrokke erwe gebruiksreg gee.” Sy sê drie kommersiële boere in die dorp baat ook by die beurte.
Woensdagoggend is die invloei na die dorp se munisipale water netwerk damme toegemaak ten einde die rouwater damvlakke, wat toe op 22% gestaan het, te herstel. “Indien die rouwater damvlakke nie hoog genoeg is nie, kan ons nie water in die netwerk invoer nie. Dan bestaan die risiko dat inwoners onderbreekte watertoevoer mag ondervind.
“Ons is nou in die warmste maande en die feesseisoen lok baie besoekers. Die gebruik het toegeneem, en moet beperk word.”
Die munisipaliteit monitor daagliks die watergebruik. Maandag 8 Januarie was dit 85 liter per persoon in Noord-End en 293 liter per persoon in Suid-End. Vorster skryf Suid End se hoë gebruik toe aan die feit dat die meeste besighede en gastehuise daar geleë is. “Aangesien Suid-End die ekonomiese kern van Prins Albert is en baie inwoners van Noord-End ook in Suid-End werksaam is, is die berekeninge van gebruik in die gebied nie altyd “clear-cut” nie. Die owerheid is tans besig met ‘n veldtog waar ons met elke besigheid s eienaar skakel om ook sy watergebruik behoeftes te verifieer en op ‘n toegelate verbruik ooreen te kom.”
Die munisipaliteit doen egter sy bes om die dorp se swembad oop te hou, ten spyte van die waterbeperkings. “Dit word deur ‘n boorgat gevoed. As die boorgat opdroog sal ons dit moet sluit. Die swembad is geleë in die area waar die gemiddelde daaglikse waterverbruik aan die waterbeperkings van 90 liter per dag per persoon voldoen. Anders as wat die algemene gevoel onder dele van die gemeenskap is, het die swembad niks te doen met watertekorte in die dorp nie.”
Vorster sê hulle is daartoe verbind om gehaltediens te lewer, en om die gemeenskap sover moontlik te beskerm teen die impak van die droogte. “Ons kan dit egter nie op ons eie doen nie, die gemeenskap moet help.”