Klip laat vaar borgtogaansoek
Justice Mooi en Sixabiso Klip, die twee verdagtes wat verlede jaar in verband met Preston Titus se moord in hegtenis geneem is, se borgtogaansoek het Woensdag
‘n interessante wending in die landdroshof geneem.
Die hof was, soos die vorige kere, stampvol en die verrigtinge het weer onder streng polisiebewaking voortgegaan.
Adv. Benito Metembo, wat Klip in opdrag van Clyde Avontuur verteenwoordig, het Woensdagoggend aan die hof gesê dat hy oomblikke voor die hof moes begin, deur sy kliënt in kennis gestel is dat hy sy borgtogaansoek laat vaar.
Metembo het egter geen redes vir sy kliënt se besluit gegee nie. Eugene Roos van die Regshulpraad tree vir Mooi in dié saak op.
Hy het aan die hof gesê dat sy kliënt steeds van plan is om vir borgtog aansoek te doen.
Landdros Roelf Konstabel het die saak dus tot 19 Januarie vir Mooi se borgtogaansoek uitgestel.
Volgens hom sal dit dan tot 13 Februarie vir verdere ondersoek uitgestel word. Beide die verdagtes sal deurentyd saam in die hof verskyn en bly in aanhouding tot 19 Januarie.
Stafsersant Preston Titus se liggaam is op 2 Desember verlede jaar met verskeie steekwonde in sy huis op die weermagbasis gevind. Hy is die man van ANC-raadslid van die Oudtshoorn-munisipaliteit en ‘n lid van die ANC se provinsiale uitvoerende raad in die Wes-Kaap, Magdaleen Titus.