Vyf botsingslagoffers ter ruste gelê
Hy wou vir sy dogter net die beste gee, maar toe sterf hulle saam in ‘n motorongeluk.
Johann Andries (34) en sy dogter, Joshey (16), alombekend as JD, het op Donderdag 22 Desember saam met Surita Botha (39) en haar twee seuns, Bentley (8) en die vyfjarige Willen in ‘n motorongeluk tussen BeaufortWes en Drie Susters gesterf toe hul motor in ‘n vragmotor wat geknipmes het, vasgery het.
‘n Verdere tragedie van Johann en sy dogter se dood is dat sy vrou, Susan, in November aan ‘n seldsame siekte oorlede is.
Die vyf oorledenes was op pad na Daniëlskuil in die Noord-Kaap toe die ongeluk gebeur het.
Andries en sy dogter is vanuit die St. Simons Anglikaanse Kerk op Oudtshoorn begrawe terwyl Botha en haar twee seuns vanuit Rosemoor VGK begrawe is.
Johann en Surita was verbonde aan die departement van maatskaplike ontwikkeling op Oudtshoorn.
Volgens Johann se spanleier by die departement, Farrel Pietersen, het hy so baie planne vir sy dogter gehad en was ‘n maklike persoon om mee saam te werk.
“Johann se dood laat ‘n groot leemte. Hy het almal se take vergemaklik deur almal te wil help. Orde en dissipline was sy wagwoorde. Hy was ‘n baie intelligente en ‘n omgeemens wat nie bang was vir uitdagings nie,” het Pietersen gesê.
‘n Familielid, Gumaine Abrahams, het Joshey beskryf as ‘n kind wat vir oud en jonk respek getoon het. Sy was saam met haar ouers baie betrokke by haar kerk, ‘n bobaasbakster en haar niggies en nefies se gunsteling.
Sy was ‘n leerder aan die Hoërskool Oudtshoorn en het verlede jaar gr. 10 geslaag. Volgens Hazel Jonker was een van Joshey se drome om eendag die kerk se orrelis te word.
Surita Botha is in huldeblyke beskryf as ‘n vrou wat vir almal omgegee het.
Chrissie Baptiste, kantoorbestuurder van die departement op Oudtshoorn, het haar as ‘n uiters lojale en hardwerkende maatskaplike werker, ‘n ware “voetewasser” en ‘n unieke persoon beskryf.
“Surita het in almal se harte by die departement ingekruip en was ‘n vrou wat kon dans in die middel van ‘n storm.”