Waterbeperkings steeds van krag
Met die Koos Raubenheimerdam se watervlak op 64%, is waterbeperkings steeds van krag in die Oudtshoorn-munisipale bedieningsgebied.
Oudtshoorn se munisipale raad het op 4 Oktober waterbesparingsmaatreëls met onmiddellike effek ingestel. Die besluit is ook geneem om strenger besparingsmaatreëls in te stel, indien die dam se watervlak tot 50% daal.
Die maatreëls wat tans van krag is, is:
Die gebruik van munisipale drinkwater vir tuine, grasperke, parke en publieke oopruimtes, word beperk tot ‘n maksimum van een uur per dag, en mag slegs tussen 07:00 en 10:00 in die oggend of tussen 18:00 en 19:00 plaasvind.
Kwekerye, groentetuine, sportstadions, gholfgras en krieketvelde is van die beperking van een uur per dag vrygestel.
Die water van enige plantegroei word tussen 10:00 en 18:00 verbied en hierdie beperking geld vir almal.
Tuinslange mag nie gebruik word vir die was van motorvoertuie en toerusting nie, sowel as die afspuit van geplaveide, beton of teeroppervlakkes. Hierdie beperking is nie van toepassing op sakeondernemings wie se bedryf dit noodsaak nie.
Die gebruik van drinkbare water wat uit die KKRWSS se ondergrondse waterbronne afkomstig is, mag slegs gebruik word vir drink- en algemene huishoudelike doeleindes, insluitend lewendehawe.
Die gebruik van hierdie waterbron is verbode vir die besproeiing van plaasgrond, tuine, grasperke, parke en oop ruimtes. Die was van motorvoertuie of toerusting en die afspuit van enige geplaveide oppervlaktes of ander strukture is verbode.
Inwoners word aangemoedig om soveel moontlik van hul grys water te gebruik.
Inwoners wat van hul eie ondergrondse water gebruik maak, moet ‘n duidelike kennisgewing op die perseel met die bewoording “boorgatwater” vertoon.