Vrou ernstig beseer in ongeluk
‘n Vrou wat besig was om na Knysna te verhuis is in die hoësorgeenheid van die Life Bay View-hospitaal nadat haar motor by Dysselsdorp gerol het.
Zandra Brown (33) was deur Dysselsdorp met die Kamanassiepad na George en Knysna onderweg toe sy volgens inligting vir ‘n donkiekar uitgeswaai en beheer oor die Ford Eco Sport verloor het. Die motor het verskeie kere gerol en in die veld op sy dak te lande gekom. ‘n Inwoner wat die motor sien tol het, het die ernstig beseerde vrou te hulp gesnel.
“Ek kon sien sy het baie seergekry en haar kop was vol bloed,” het Hy Maandagoggend op die ongelukstoneel gesê. Brown is met ernstige beserings na die Mediclinic in Oudtshoorn geneem, maar is dadelik na Mosselbaai oorgeplaas.
Haar man, Clive, het Dinsdag gesê hy en Zandra het Saterdag in twee voertuie uit Johannesburg vertrek.
“Ons het Saterdag in Kroonstad oorgeslaap en Sondag in Beaufort-Wes by vriende aangedoen. Zandra het besluit om Sondagaand by hulle te oornag, maar ek moes Knysna toe ry omdat ek Maandagoggend daar moes begin werk.” Hy sê Zandra het hom Maandagoggend gebel om te sê sy vertrek uit Beaufort-Wes en die volgende wat hy iets gehoor het was toe die polisie hom net na negeuur bel en van die ongeluk verwittig.
Volgens Clive het Zandra by die hospital gesê sy wou verby die donkiekar ry, maar het kinders gesien en gerem. Sy het ‘n ernstige kopbesering opgedoen wat tot bloeding op die brein gelei het. Verder het sy frakture aan ‘n sleutelbeen, een skouer en een hand. Daar is ook ‘n nekwerwel wat gekraak is. Teen Woensdag was sy nog in die hospitaal se hoësorgeenheid.