Winskoop KKNK-kaartjies
Inwoners van Oudtshoorn en omliggende dorpe kry volgende week die geleentheid om weekkaartjies vir die KKNK se Kuierbuurt teen 30% goedkoper te koop. Die splinternuwe Kuierbuurt word op die sportterrein weerskante van Vredestraat aangebied en vervang die vorige Rivierbuurt.
Weekkaartjies wat normaalweg R255 per persoon kos, word op Maandag 22 en Dinsdag 23 Januarie teen slegs R175 aangebied. Die afslagkaartjies kan in die voorportaal van die burgersentrum op die hoek van Voortrekker- en Langenhovenweg gekoop word. Kaartjieverkope sal Maandag tussen 09:00 en 17:00 en Dinsdag tussen 09:00 en 14:00 plaasvind.
“Ons moedig alle Oudtshoorniete aan om hierdie eksklusiewe Kuierbuurt weekkaartjieaanbod op een van dié twee dae te koop, om sodoende seker te maak dat hulle ál sewe feesdae kan feesvier,” sê Hugo Theart, waarnemende uitvoerende hoof van Kunste Onbeperk, die maatskappy wat die KKNK aanbied.
Die nuwe Kuierbuurt, geleë op die Oudtshoorn-sportterrein en die Vredestraatsportterrein, bied hope vermaak vir die hele gesin en is die tuiste van onder andere die Absa-kunsmark se stalletjies, die Huisgenoot-verhoog met topkunstenaars en nuwe stemme wat saans vermaak onder die Klein Karoo-sterre verskaf, die Castle Lager-verhoog waar musiek deur die dag aangebied word, Liplekker se heerlike wyn en deli-produkte, ATKV-Speelbos met hope doendinge vir die jongspan, waaronder Uitkampteater-produksies en ander kroeë en rusareas.
Vertonings
Die aandvertonings (19:30) op die
Huisgenoot-verhoog, wat in die formaat van piekniekervarings aangebied word, sluit onder meer in: Awê Kaktus (29 Maart) met Mi Casa, Spoegwolf, Mathew Mole en Majozi; kykNET – Dans op die vlaktes
(30 Maart) met Kurt Darren, Leah, Craig Lucas, Paxton, Germandt Geldenhuys, Nadia Beukes, Stephanie Baartman en nog meer; Karoonag (31 Maart) met Adam Tas, Refentse, Joshua na die Reën, Karin Kortjé, Caroline Grace en Fatman; Boontoe:
Engelstemme (1 April) met Jo Black, Robbie Wessels, André Terblanche, Corlea Botha, Thembeka, Kyle Seconna, Hoërskool Oudtshoorn se Ad Astra-koor en orkes, Melissa van der Spuy, Tim Rankin, Henry Steele en Schalk van der Merwe; Sterrenag
– Musiek met hart (2 April) met Jay, Leah, Pieter Koen, Willem Botha, Lee Scott en ander; en Rymklets van Oos tot Wes (3 April) met HemelBesem, Yoma, Early B, Oxijin, DJ J-EFX, Yugi Yo en MC IXA.
Feesgangers kan hulle eie stoele en ’n kombers bring.
Kaartjieverkope
Volgens Theart is daar geen beperking op die aantal kaartjies wat per persoon gekoop kan word nie. “Ons hoop om alle Oudtshoorniete deur die loop van dié twee dae by die burgersentrum te sien,” nooi hy.
Die feesprogram van die 24ste KKNK word op Maandag 22 Januarie op Oudtshoorn bekendgestel en algemene kaartjieverkope open op Dinsdag 23 Januarie by Computicket, Shoprite / Checkers en House & Home. Die KKNK word oor Paasnaweek van Donderdag 29 Maart tot Woensdag 4 April op Oudtshoorn aangebied.