Padwerke loop toe dood
Vrese wat sedert verlede jaar geopper is dat padwerke tussen De Rust en Oudtshoorn nie na wense verloop nie, het nou waar geword.
Dit het hierdie week aan die lig gekom dat die maatskappy wat die kontrak van meer as R200 miljoen losgeslaan het so diep in die skuld gedompel is dat hulle geen hoop het om daaruit te kom nie.
NMC het op 18 Desember aansoek gedoen om toegelaat te word om in sakeredding in te gaan. Dit beteken dat die vooruitsig van plaaslike kontrakteurs om meer as R5 miljoen by NMC te kry vir die onmiddellike toekoms gesneuwel het en daarmee saam die hoop dat die werk teen die einde van 2018 voltooi sal wees
Die bom rondom NMC het verlede jaar gebars toe die Oudtshoorn Courant verskeie gerugte en inligting ondersoek het en op 3 November onthul het dat NMC meer as R5 miljoen aan plaaslike subkontrakteurs verskuldig is. Dit het daartoe gelei dat die Wes-Kaapse departement van vervoer NMC op kennis geplaas het dat hulle teen ‘n sekere tyd bewyse moet lewer dat hulle hul verpligtinge kan nakom.
NMC het in gebreke gebly om dit te doen en die departement het hulle in kennis gestel dat hulle kontrak beëindig word.
In nog ‘n voorbladberig op 1 Desember het die Oudtshoorn Courant oor die beëindiging van die kontrak berig. Op daardie stadium het NMC gesê hulle het ‘n hofaansoek gebring om die beëindiging teë te staan en dat hulle met hulle normale werk voortgaan. Enkele dae later het hulle egter die werk gestaak en van die perseel onttrek. (Sien
Oudtshoorn Courant 8 Desember)
Met die aanvang van die nuwe jaar is navrae oor die hofsaak en die situasie rondom die padwerke aan NMC en Byron la Hoe van die departement van vervoer gestuur.
James Dow van NMC, wat verlede jaar namens hulle kommentaar gelewer het, het op die jongste navraag gesê hy kan nie meer namens sy werkgewers kommentaar lewer nie. La Hoe het gesê die hofsaak wat in Desember moes plaasvind het nie plaasgevind nie. Hy het egter gesê dat NMC om sakeredding aansoek gedoen het en dat daar op hierdie stadium geen verandering aan die situasie is nie.
Dit beteken kortom dat konstruksiewerk aan die pad vir die volgende aantal maande botstil gaan staan. Die departement sien tans toe dat die verkeersbeheerpunte beman word.
Wat NMC se aansoek om sakeredding aanbetref is dit slegte nuus vir die kontrakteurs aan wie geld geskuld word. Volgens die aansoek wat die hoof- finansiële beampte van NMC Civils, André Vlok, op 15 Desember aan die Kommissie vir Maatskappye en Intellektuele Eiendom gerig het, skuld NMC Civils en ander maatskappye onder hulle sambreel bykans R170 miljoen aan skuldeisers asook meer as R19 miljoen aan Standard Bank.
In die stukke sê Vlok dat dit onwaarskynlik is dat NMC sonder die hulp van ‘n sakereddingspraktisyn enige skuld sal kan delg en moontlik binne ses maande gevaar loop om insolvent verklaar te word.
Wanneer ‘n maatskappy onder sakeredding geplaas word kan daar geen siviele eise ingedien word nie. NMC se situasie en die hangende hofsaak beteken verder dat die departement van vervoer nie in die afsienbare toekoms ‘n ander kontrakteur kan aanstel nie.