Swembaddens deur duisende besoek
Die Kerkstraat-swembad, wat vir die eerste keer in vier jaar oop is, het hierdie vakansie saam met die ander ses munisipale swembaddens in Oudtshoorn en omgewing gesorg vir lafenis aan derduisende kinders en volwassenes.
Volgens Aurelia Oliphant, woordvoerder van die Oudtshoorn-munisipaliteit, het die swembaddens tot dusver ongeveer
10 000 kinders en 2 000 volwassenes gelok. Ongeveer 130 mense het seisoenkaartjies gekoop.
Die onderhoud van die swembaddens is egter volgens haar ‘n groot uitdaging.
“Infrastruktuur en toerusting bly ‘n probleem. Dit veroorsaak veranderings aan die kwaliteit van ons diens. Die ander groot probleme is vandalisme, inbrake en gebruikers wat onder die invloed van drank en dwelms swem.”
Volgens haar het hulle min van dié voorvalle gehad en beheer die sekerheidswagte dit goed, maar die munisipaliteit vra steeds inwoners om nie na die swembaddens te kom as hulle onder die invloed is nie.
Oliphant sê besoekers wat onaanvaarbare taal teenoor die personeel by die swembad gebruik is ook ‘n probleem.
Volgens haar hang die hoeveelheid personeel wat by die swembaddens werk, af van hoe groot die swembad is.
“Daar sal by swembaddens een kassiere, een toesighouer en twee skoonmakers wees en tussen twee en drie lewensredders en vier tot ses sekerheidswagte.”
Die munisipale swembaddens sal vanjaar elke dag tot 28 Februarie oop wees. In Maart sal die swembaddens slegs oor naweke tot die laaste naweek van die maand oop wees.