Timbercity Klein Karoo sake-aflos om die draai
Die Timbercity Klein Karoo sake-aflos vind weer op Donderdag 22 Februarie in Baron van Reedestraat, Oudtshoorn, plaas.
Dié jaarlikse sportbyeenkoms word deur die Klein Karoo Atletiekfonds (KKAF) aangebied. Dave van der Walt, operasionele bestuurder van die KKAF, sê: “Ons nooi weer die Oudtshoorn-gemeenskap, insluitende skole (hoër- en laer), besighede, staats- en semi-staatsinstellings en gestremdes om aan die sake-aflos deel te neem.”
Die Oudtshoorn-sakekamer het by monde van die voorsitter, Gideon Badenhorst, hulle volle ondersteuning toegesê aan die prysenswaardige projek. Verskeie besighede het hulle alreeds verbind en uitnodigings sal binnekort na alle belanghebbendes uitgestuur word.
Van der Walt het die munisipaliteit bedank vir die groot rol wat munisipale verkeersdienste speel in die beheer van die verkeer.
Die sake-aflos vind plaas in Baron van Reedestraat, tussen Voortrekkerweg en Van der Rietstraat. Dit begin om 18:00. Die begin en eindpunt is oorkant die Santa Fe Spur. ‘n Feestelike atmosfeer word geskep om die inwoners van Oudtshoorn die geleentheid te bied om mekaar beter te leer ken. “Daar word selfs oorweeg om Fancy Dress tema vanjaar in te voeg.”
Daar kan in verskillende kategorieë deelgeneem word. Dit bestaan uit stap (4 per span) of draf (6 per span). Elke lid van ‘n span lê net 2 km af. Spanne kan ook as volg saamgestel word: Mans, dames, mans en dames (twee van elk), hoërskole, laerskole en gestremdes. Alle staat- en semi-staatsinstellings soos die SANW, SAPD, hospitaal, paaie, binnelandse sake en munisipaliteit word uitgedaag om spanne in te skryf.
Van der Walt sê slegs 100 spanne kan geakkommodeer word. “So, die wakkerslapers gaan eerste gehelp kan word.”
Daar mag meer as een span per instansie ingeskryf word. Die koste beloop R20 per persoon - drawwerspanne (R120) en stapspanne (R80). Alle deelnemers van spanne wat klaarmaak ontvang ‘n bronsmedalje, terwyl die wenspanne in elke kategorie goue medaljes ontvang. Daar sal ook heelwat pryse op die spel wees.
Inskrywingsvorms kan by die Edensportakademie (De Jager-sportkompleks) en die Oudtshoorn-toerismeburo (regoor die munisipale gebou in Voortrekkerweg) gekry word en ook daar ingehandig word. Dit kan ook elektronies na die instansies gestuur word. Dit kan ook by Van der Walt (davesus@telkomsa.net) aangevra word of laai dit van die KKAF-webtuiste (www. edenmiles.co.za) af. Dit kan dan ook weer na Van der Walt gestuur word.
Vir meer inligting kan Van der Walt by 082 774 4901 geskakel word.
Die KKAF is ‘n nie-winsgewende organisasie wat daargestel is om atlete (hoofsaaklik uit benadeelde omstandighede) te ondersteun om hulle sportloopbane te ontwikkel.
Daar word ook aandag gegee aan die ontwikkeling van hulle vaardighede en om hulle vir die totale lewenstaak vorentoe te ontwikkel.