Titus borgtog geweier
Die borgtogaansoek van Magdaleen Titus, een van die verdagtes in die moord op haar man, Preston Titus, is gister in die Oudtshoorn-landdroshof van die hand gewys.
Landdros Errol Thomas het gesê dat sy op aanklag van moord verskyn en dat daar wederregtelik en opsetlik saamgesweer is om Preston te vermoor deur hom met ‘n mes te steek en hom met ‘n hamer te slaan.
Volgens hom het Titus besluit om nie self in die hof te getuig nie, maar eerder haar redes om wel op borgtog vrygelaat te word, deur middel van ‘n verklaring aan die hof oor te dra.
Hy het verder oor die ondersoekbeampte, ao. Martin le Roux se getuienis gepraat en gesê dat die staat wel ‘n baie sterk prima facie saak teen Titus het.
Thomas het gesê dat hy hoofsaaklik, maar nie uitsluitlik nie, op drie punte gaan fokus met betrekking tot die beslissing van die borgtogaansoek.
Volgens hom gaan dit oor die sterkte van die saak, die opweging van belange van geregtigheid teenoor Titus en buitengewone omstandighede wat bewys waarom Titus vrygelaat moet word.
Thomas het toegegee dat die staat wel baie sterk op Sixabiso Klip, die eerste verdagte in die saak, se verklaring steun, maar volgens hom sou daar genoeg ander getuienis gewees het om Titus te arresteer al het die ondersoekspan nie Klip se verklaring gehad nie.
Wat die belange van geregtigheid teenoor Titus aanbetref het Thomas gesê dat daar geen bewyse is dat Titus die veiligheid van die publiek in gedrang sou stel indien sy op borgtog vrygelaat word nie. Hy het wel die feit dat daar ‘n moontlikheid is dat sy met getuies kan inmeng opgehaal.
“Die ondersoekbeampte het getuig dat die applikant met ‘n pastoor in verbinding was na haar arrestasie en dat sy hom gevra het om te bid dat die bewyse moet verdwyn. Hierdie is ‘n feit wat nie geïgnoreer kan word nie, veral omdat sy ‘n leier in die gemeenskap is.”
Hy het verder gesê dat hy dit baie eienaardig vind dat Titus nooit na die moord kontak met haar skoonma gemaak het nie.
“’n Mens sal dit van enige redelike persoon verwag om kontak met ‘n skoonouer te maak en te behou na die afsterwe van ‘n eggenoot.”
Die ander kwessies wat Thomas ook aangehaal het was die feit dat sy tydelik deur die ANC geskors is en dat sy in haar verklaring aan die hof gesê het sy gaan in Jonesstraat by vriende woon sou sy op borgtog vrygelaat word.
“Dit is vreemd dat sy in die hof noem dat sy by vriende gaan woon, maar die eienaars van die woning ontken vriends kapsbande met die applikant.”
Hy het ook gesê dat Titus se kinders in die veilige sorg van haar familie in Worcester is.
“Die hof sien geen buitengewone omstandighede om die applikant op borgtog vry te laat nie. Die feite voor die hof was skokkend en dus kan die hof nie voorkeur gee aan haar vryheid na die wrede moord op haar man nie.”
Hy het die saak van Titus en die ander twee beskuldigdes, Natasha Stuurman en Justice Mooi, tot 9 April uitgestel.
Stuurman se prokureur, Chris Morgan, het na afloop van die hofverrigtinge aan die
Oudtshoorn Courant gesê dat hy met sy kliënt gaan konsulteer oor haar borgtogaansoek. Daar is egter nog geen duidelikheid of sy wel gaan aansoek doen of nie. Joshua Greeff, Titus se prokureur, het aangedui dat hy ook nog met Titus moet konsulteer om vas te stel of sy teen die hof se besluit wil appelleer.