Damvlak daal, tariewe onveranderd
Die Oudtshoorn-munisipaliteit is besig om al vyf die dorp se reservoirs skoon te maak. Johan U ys, gehalte bestuurder by die Oudtshoorn-munisipaliteit se waterwerke, het gesê die eerste reservoir aan die agterkant van Oudtshoorn Korrektiewe dienste, is Donderdag 1 Maart skoongemaak.
Intussen het die Raubenheimerdam se watervlak tot 50% gedaal. Alhoewel ‘n raadsbesluit van 2017 bepaal dat indien die dam sy 50%-vlak bereik, strenger waterbeperkings en hoër watertariewe ingestel sal word, het Uys Woensdag gesê: “Strenger waterbeperkings en hoër watertariewe sal nie nou ingestel word nie. Ons maak staat op die Mellvilledam se inloop na die Raubenheimerdam om ‘n gemiddelde van 50% watervlak vir die dorp se hoofwaterbron te verseker.”
Die Mellvilledam is slegs 5% die grootte van die Raubenheimerdam, maar bly bykans permanent vol. Uys verduidelik: “Die Raubenheimerdam word vanuit twee klowe in die Swartberge gevoed. Die Mellvilledam is in die een kloof geleë en ons maak staat opsy storings kapasiteit .”
Met betrekking tot die dorp se resevoirs, het Uys gesê: “Vier van die dorp se vyf reservoirs kan elk 13,5 miljoen liter water stoor. Die Kerkstraat reservoir stoor slegs 3,6 miljoen liter water.”
Uys het verduidelik dat die skoonmaakproses jaarliks plaasvind en geen water gemors word nie.
“Die inlaatklep word toegemaak en wanneer die dam leeg is met voorsiening van water aan die dorp, vind die skoonmaakproses plaas.”
Ntobeko Mangqwengqwe, woordvoerder vir die Oudtshoorn-munisipaliteit, het Dinsdag gesê: “Ons het die uitslae ontvang van die watermonsters wat Dinsdag 27 Februarie geneem is. Alhoewel al die reservoirs se E.coli tellings nul is, is ons dit eens dat die water vir drinkdoeleindes, steeds gekook moet word, aangesien dit steeds troebel is en dit dus die effektiwiteit van die chlorinering verminder.”
Oor die bou van‘ n watersuiweringsaanleg vir Oudtshoorn, het Uys gesê: “Dit sal meer as R100 miljoen kos om so ‘n aanleg te bou, maar ‘n voorlegging is reeds opgestel om aan die raad voor te lê. Ons as departement waterwerke sal graag ‘n suiweringsaanleg vir die dorp wil hê.”