Politici stry oor Kannaland se munisipale leiers
Die politieke stryd binne Kannaland se munisipale raad duur steeds voort. Hierdie keer is die munisipale bestuurder, Reynold Stevens, en die hoof van finansies, Bennie Strydom, se aanstellings die onderwerp van onmin.
Stevens is op 1 Junie 2017 as munisipale bestuurder aangestel en Strydom het op 1 Julie 2017 die stoel as hoof van finansies ingeneem.
Die Wes-Kaapse minister van plaaslike regering, omgewingsake en ontwikkelingsbeplanning, Anton Bredell, het na klagtes van Icosa regshulp ingewin om die wettigheid van hul aanstellings te ondersoek.
Ian Avontuur, woordvoerder van Kannaland se burgemeester, Magdalena Barry, het bevestig dat Bredell se kantoor bevind het dat daar teenstrydighede met hul aanstellings was en die regte prosedure gevolg moet word. “Die minister het bevind dat daar mense op die aanstellings komitee was wat nie daar mag wees nie,” het Avontuur gesê.
Tydens ‘n raadsvergadering op 28 Februarie het die DA en ANC, wat elk met drie raadslede saamwerk teen Icosa, besluit om Stevens en Strydom as voltydse bestuurders te onthef en hulle vir ‘n drie maande tydperk tydelik in hul poste as waarnemende bestuurders aan te stel.
Hul poste is Sondag 4 Februarie in nasionale koerante geadverteer.
Jeffrey Donson, leier van Kannaland Icosa, beskryf dié DA/ANC-raadsbesluit as “verskriklik.” Hy sê, “Die Kannalandraad, en die provinsiale regering minag die mense van Kannaland. Die raad het in weerwil van ernstige teenkanting van Icosa, besluit om skeidingspakette te beding met die munisipale bestuurder en die hoof finansiële beampte.”
Avontuur ontken dat skeidingspakette beding is .“Die hele aanstellings proses word oorgedoen en beide bestuurders mag weer aansoek doen. Hulle is nie onbevoeg vir hul werk bevind nie. Die proses van die aanstellings word net bevraagteken.”
Donson staan egter op sy punt dat, “Kannaland het die speelbal van eiegeregtige politiekery geword. Hierdie vergryp sal onmiddellik einde kry.
Die mense van Kannaland is nie die provinsiale regering en politieke partye se gekke nie.”