Twaalf beseer toe bakkie rol
Drie ambulanse het 12 beseerdes hospitaal toe geneem nadat ‘n bakkie Saterdagoggend tussen Oudtshoorn en Dysselsdorp gerol het.
Volgens nooddienswerkers op die toneel het die bestuurder van die bakkie gesê sy het ‘n vragmotor verbygesteek. Die vragmotor het glo skielik na regs beweeg en die bakkie getref.
Die bakkie het op die grondskouer aan die regterkant van die pad beland en teruggeswaai na links. ‘n Sleepwaentjie wat aan die bakkie was het losgebreek en aan die regterkant van die pad beland. Die bakkie het daarna gerol.
Die veselglaskappie is afgeruk en passasiers wat agter op die bakkie was is uitgeslinger. Die vragmotorbestuurder was skynbaar onbewus van die ongeluk en het nie stilgehou nie.
Terwyl die Oudtshoorn Courant op die toneel was, het verkeersbeamptes ‘n boodskap ontvang dat ‘n vragmotor wat die beskrywing pas, in Voortrekkerweg voorgekeer is. Dit kon egter nie deur die koerant bevestig word nie.
Ten spyte van die erns van die ongeluk was daar geen kritieke beserings nie. Nadia Ferreira, woordvoerder van die Wes-Kaapse departement van gesondheid, het bevestig dat 12 pasiënte hospitaal toe geneem en behandel is.
“Beserings was meestal laserasies, kneusplekke, en rug- en nekbeserings. Twee pasiënte, onder wie ’n kind, is oornag gehou vir waarneming.”
Volgens die polisie word ‘n klag van roekelose en nalatige bestuur ondersoek.