Niemand staan pa vir straatkinders
Dit blyk dat daar geen gesamentlike owerheidsplan in Oudtshoorn bestaan wat die probleem van straatkinders, leeglêers en bedelaars ondersoek nie.
Na drie weke se navrae aan die munisipaliteit, polisie en department van maatskaplike dienste is dit duidelik dat nie een van die instansies verantwoordelikheid aanvaar vir ‘n plofbare kwessie wat wag om vlam te vat nie. Die Oudtshoorn Courant het verskeie klagtes van inwoners ontvang oor haweloses, jeugdiges en leeglêers wat op ‘n daaglikse basis in die middedorp is en snags op persele se stoepe en op munisipale eiendom slaap. Volgens ‘n bestuurslid van Oudtshoorn-toerisme, Niel Els, is die daaglikse toneel wat besoekers soggens naby die toerismekantore begroet, ‘n groep haweloses wat onder kartonne en komberse op die gras langs die museum lê en slaap. Verder word besoekers en toeriste op elke hoek en voor elke eetplek deur bedelende jeugdiges gekonfronteer.
Voorvalle waarvan inwoners die afgelope tyd getuig het sluit in vrouens wat by die De Jager-sportkompleks deur ‘n jeugdige beroof is, ‘n bejaarde vrou wat onderweg na haar huis die hulp van personeel by ‘n onderneming moes inroep omdat jeugdiges gedreig het om haar kos en inkopies af te neem, vroulike personeellede van ‘n besigheid wat deur ‘n groep jeugdiges gedreig is en die polisie se beweerde onwilligheid om op te tree nadat die vroue hulle gebel het.
Die gemeenskap s radiostasie S FM het binne ‘n dag nadat hulle luisteraars genooi het om briewe te skryf oor voorvalle en probleme met jeugdiges en bedelaars op straat, meer as 30 e-posse en briewe per hand ontvang. Die briewe bevat glo verskeie voorvalle waarby groepe jeugdiges betrokke is.
Die Oudtshoorn Courant se navrae aan die onderskeie departemente het duidelik gewys dat daar geen uitvoerbare plan op die tafel is nie. Volgens kapt. Louis Visser, woordvoerder van die Oudtshoorn polisie, tree die polisie in sodra‘ n misdaad aangemeld word. Hy noem egter dat minderjariges by baie voorvalle betrokke is en dus deur die departement van maatskaplike dienste aangespreek moet word. Dennis Ngonyama, die bestuurder van die departement van maatskaplike ontwikkeling sê egter weer dat die meeste voorvalle jeugdiges bo 18 insluit en dat sy departement dan nie kan optree nie. Volgens hom volg sy departement slegs voorvalle op waar minderjariges betrokke is.
Die munisipaliteit is tjoepstil oor die aangeleentheid. Behalwe vir ontvangs erkenning op die koerant se navraag verlede week, is geen ander reaksie ontvang nie.
Die enigste daadwerklike privaat inisiatief wat sedert Junie 2014 probeer het om die probleem van straatkinders op te los was die St Francis Invalsentrum wat deur Famsa bestuur is. Famsa het egter die sentrum as gevolg van ‘n tekort aan hulpbronne, finaal aan die einde van Februarie gesluit.
“Ons kon net eenvoudig nie meer op ons eie aankarring sonder ‘n daadwerklike onderneming van die munisipaliteit om ons te ondersteun nie,” het Franzu Badenhorst, direkteur van Famsa Karoo, Woensdag gesê.
Die Oudtshoorn-besigheidskamer het tydens hulle strategiese sessie verlede maand nege projekte in Oudtshoorn geïdentifiseer wat dringend aandag moet kry. Een van die projekte is die skoonmaak en veiligheid van die dorp. ‘n Komitee is benoem om hierdie kwessie, wat onder andere straatkinders en leeglêers in die dorp sal insluit, onder die loep te neem. Die komitee se eerste beplannings vergadering is gister gehou.