Bridgton laat Maori’s les opsê
Bridgton-rugbyklub se eerste span het Saterdag 17 Maart met 34-20 in hul tweede SWD-Premierliga vir die seisoen, oor Maori’s geseëvier en sodoende vir sy vorige week se nederlaag teen Crusaders opgemaak.
Anver Venter, Bridgton se buitesenter, het 14 van sy span se punte aangeteken. Hy het soos verlede jaar, gewys dat sy span weer baie op sy talent en vernuf sal staatmaak.
Venter het met drie doelskoppe en ‘n strafdoel, nege van sy span se punte met die skopskoen aangeteken. Hy het egter bewys dat hy nie net met die skopskoen sy span ‘n hupstoot besorg nie, maar ook een van Bridgton se vyf drieë gedruk.
Bridgton se ander drieë is deur Charlston Ewerts (linkervleuel), Hardus Coetzee (flank) en Bradwin Wanies (heelagter, 2) gedruk.
Maori’s se drieë is gedruk deur Enrico Fielies (skrumskakel, 2) en Selwyn Jakobs (regtervleuel). Marshel Frans (losskakel) het met ‘n doelskop en ‘n strafdoel geslaag.
Bridgton sal eerskomende Saterdag teen die Premierligakampioene, Progress, in George speel.